Былтыр еліміздегі электронды сауда нарығының көлемі 1,8 есеге өсіп, 700 млрд теңгеден асты. Ал электронды сауданың бөлшек саудадағы үлесі 3,7%-ға жетті. Үкімет отырысында сауда және интеграция министрі Бақыт Сұлтанов осылай деді.
Министрдің мәлімдеуінше, ел аумағындағы интернет-дүкендерден сатып алу көлемі 422 млрд, халықаралық интернет-алаңдары бойынша жасалған сауда 280 млрд теңгені құрады.
"2019 жылы белсенді сатып алушылардың саны 72%-ға артып, 3,2 млн адамға жетті. Смартфонмен сауда жасайтын қазақстандықтардың саны 65%-ға жақындады", – деді Бақыт Сұлтанов.
Оның сөзінше, былтыр электрондық коммерцияны дамытудың 2019-2025 жылдарға арналған жол картасы қабылданды.
"Бұл құжаттағы шаралар 3 бағыт бойынша құрылымдалған. Бірінші - электронды саудада экспортты арттыру. Екінші – отандық кәсіпкерлерді электрондық саудаға тарту және инфрақұрылымды дамыту. Үшінші – тұтынушылардың құқықтарын қорғау және электронды сауданы ілгерілету", – деді Бақыт Сұлтанов.
Қанат Махамбет
