Солтүстік Корея шығыс корейаралық Донхэ жолында әзірге белгісіз құрылыстар салып жатыр, деп хабарлайды inbusiness.kz сайты Yonhap ақпарат агенттігіне сілтеме жасап.
Оңтүстік Кореяның шекаралық бақылау шенеуніктерінің мәліметінше, белгісіз құрылыс шекарадағы бетон бөгеттер үшін негіз болуы мүмкін.
Yonhap ақпаратына сәйкес, Кенги жолында мұндай құрылыстар салу белгілері әзірге анықталған жоқ.
15 қазанда Солтүстік Корея Оңтүстік Кореяға апаратын батыс пен шығыстағы екі тас жолдың учаскелерін жарып жібергенін еске саламыз.
Солтүстік Корея 9 қазаннан бастап өз аумағын Оңтүстік Кореямен байланыстыратын барлық автомобиль мен теміржолдарды бұғаттау және тоқтату жұмыстарын жүргізетінін жазған едік. Араға ұзақ уақыт салмай Солтүстік Корея Оңтүстік Кореямен бірігуден ресми түрде бас тартатынын хабарлады.
