Мемлекет басшысы Қасым-Жомарт Тоқаев Түркі ұйымының заманауи технопарктер орталығын құруды ұсынды, деп хабарлайды inbusiness.kz порталы "ҚазАқпаратқа" сілтеме жасап.
Оның пікірінше, бүгінде инновация мен стартаптарды дамытуға қолайлы жағдай жасау қажет.
"Бұл – ақпараттық технология дәуірінің басты талабының бірі. Сіздерді Түркі ұйымының заманауи технопарктер орталығын құру мәселесін зерделеуге шақырамын", – деді Президент Түркі мемлекеттері ұйымының саммитінде.
Сондай-ақ Қасым-Жомарт Тоқаев 2022 жылы IT саласында еңбек етіп жүрген жастардың форумын өткізуді ұсынды.
"Оны Astana Hub халықаралық IT-стартаптар технопаркінде ұйымдастыруға болады. Қазір онда 560-тан аса компания жұмыс істеп жатыр. Оның 55-і – шетелдік компания. Стартаптар соңғы 2,5 жылда 375 млн доллардан аса пайда тапты. Сондай-ақ 132 миллион долларға жуық инвестиция әкелді. Жалпы Astana Hub технопаркінде жеңілдетілген визалық режим бар. Ал онда жұмыс істейтін компаниялар салықтан босатылады", – деп түйіндеді сөзін Мемлекет басшысы.
Айта кетейік, осыған дейін Президент Президент "жасыл" облигация нарығын дамытуға шақырған.
