Ұлттық банк төрағасы Тимур Сүлейменов Цифрлық активтер және төлем жүйелері комитеті құрылатынын айтты, деп хабарлайды inbusiness.kz сайты.
Тимур Сүлейменов цифрлық активтер нарығын дамытуға қатысты негізгі практикалық шараларды атап өтті.
Біріншісі – лицензияланған провайдерлердің функциясын кеңейту. Нарықта толық циклді компаниялар пайда болуға тиіс. Олар цифрлық активтерді шығарады, сатады, айырбастайды және сақтайды.
Сондай-ақ есеп айырысуды жүргізеді. Операцияларға банктер, брокерлер және басқа қаржы ұйымдары кеңінен тартылады, деп түсіндірді Ұлттық банк басшысы.
"Екіншісі – Қазақстанда шығарылған стейблкоиндерді пайдалану. Олар тауарлар мен қызметтерге ақы төлеуде, экспорттық-импорттық операцияларда және трансшекаралық аударымдарда қолданылады. Бұл есеп айырысуды жеделдетіп, бизнес шығындарын азайтады. Үшіншісі – орталықтандырылмаған қаржыны реттеу тәсілдерін әзірлеу. DeFi бизнес-модельдеріне талдау жүргізіліп, оның үздік артықшылықтары – жылдамдық пен смарт-механизмдерді жаңа бағдарламаланатын сервистерді енгізу көзделеді", – деп түсіндірді Тимур Сүлейменов.
Төртіншісі – цифрлық майнингті дамыту. Майнинг үшін жалпы энергия жүйесіне қосымша жүктеме түсірмейтін пайдаланылмайтын, автономды және жаңартылған энергия көздерін пайдалану ұсынылады.
"Бесіншісі – арнайы салық режимін құру, оның ішінде 2026-2028 жылдары қазақстандық провайдерлер арқылы жасалған операциялар бойынша жеке тұлғалардың кірісін жеке табыс салығынан босату. Алтыншысы – Ұлттық Банктің жанынан Цифрлық активтер және төлем жүйелері комитетін құру. Ол саясатты әзірлеуді, лицензиялауды, қадағалауды, талдауды және инновациялық жобаларды сүйемелдеуді біріктіреді", – деді Ұлттық банк төрағасы.
Айта кету керек, бұған дейін үш криптоактивке арналған жаңа ETF бойынша 1 млрд теңгеге 650 операция жасалғанын жазғанбыз.
