Бұл туралы Қаржы министрлігі Бюджеттік кредиттеу, ҚР Ұлттық қоры және қаржы секторы мәселелері бойынша өзара іс-қимыл департаментінің директоры Айбол Арғынғазинов айтты, деп хабарлайды inbusiness.kz сайты.
"Біріншіден, біз Ұлттық қордың қаражатына қол сұқпаймыз. Мұнда тек қана Ұлттық қордың түскен пайдасының тең жартысын жыл сайын "Ұлттық қор – балаларға" жобасын іске асыруға жұмсап отырамыз. Сондықтан да, мұндай тәуекел жоқ. Екіншіден, алдымызда 2030 жылға дейін Ұлттық қор активтерін 100 млрд долларға жеткізу туралы Мемлекет басшысының тапсырмасы бар", - деді спикер тілшілердің сауалына берген жауабында.
Сөзінше, бұл бағытта Үкімет те, Ұлттық Банк те тиісті жұмыс жүргізіп жатыр.
"Сол себептен күн тәртібінде мұндай мәселе тұрған жоқ", - деді Айбол Арғынғазинов.
Еске салайық, осыған дейін 2024 жылы Ұлттық қордан балаларға екінші мәрте ақша түспейтінін жазған болатынбыз.
