Саммит "Дауыс бірлігі – мақсат бірлігі" тақырыбы аясында жаһандық Оңтүстік елдерін ортақ платформада пікір алмасу үшін біріктіруді көздейді.
"Іс-шара Васудхайвы Кутумбакам Үнді философиясына (Әлем – бір отбасы) негізделген. Үндістанның G20-ға төрағалығы ұйымға мүше емес елдерге өз идеяларын бөлісуге мүмкіндік береді", - делінген хабарламада.
Саммит 10 сессиядан тұрады: төртеуі – 12 қаңтарда, алтауы 13 қаңтарда өтеді. Әр сессияға 10-20 елдің басшылары мен министрлері қатысады деп күтілуде.
"Ұлықтау және қорытынды сессиялар мемлекет пен үкімет басшылары деңгейінде өткізіледі, оларға Үндістанның Премьер-министрі Нарендра Моди төрағалық етеді. Көшбасшылардың бірінші сессиясының тақырыбы – "Жаһандық Оңтүстіктің дауысы – адамға бағытталған даму", қорытынды сессия "Дауыс бірлігі – мақсат бірлігі" тақырыбында өтпек", - деп хабарлады елшілік.
Министрлер деңгейінде келесі тақырыптар бойынша 8 сессия өтеді:
- "Адамдарға бағытталған дамуды қаржыландыру";
- "Өсу мен экологиялық таза өмір салты арасындағы тепе-теңдік";
- "Жаһандық Оңтүстіктің басымдықтары – қолайлы ортаны қамтамасыз ету";
- "Энергетикалық қауіпсіздік және даму – өркендеуге жол картасы";
- "Денсаулық сақтаудың тұрақты жүйелерін құру үшін ынтымақтастық";
- "Адам ресурстарын дамыту және әлеуетті арттыру";
- "Жаһандық Оңтүстікте синергияны дамыту – сауда, технология, туризм және ресурстар";
- "G-20: Үндістан төрағалығына арналған ұсыныстар".
