Жамбыл облысында баукеспелер басқасын былай қойып, енді қабірлердің қоршауына қол сала бастады.
Жамбыл облыстық полиция департаменті Жамбыл аудандық полиция бөлімінің учаскелік полиция инспекторлары аумақты патрульдеу барысында зираттағы қабір қоршауларын ұрлады деген күдікпен 31 және 34 жастағы Тараз қаласының тұрғындарын ұстаған.
Қылмыс үстінде қолға түскен ер адамдар қоршауларды бұзып, металлдарын ұрламақ болған. Олар зираттарды ақша үшін талқандап, қоршауларын бөлшектеп, темірге өткізуді жоспарлағанын мойындады. Ұсталғандардың "Фольксваген Гольф-3" және "ВАЗ-2109" маркалы автокөліктерінің жүк салғышынан қабір қоршауларының бөліктері және арнайы бұзатын құрал табылды.
Аталған дерекке қатысты сотқа дейінгі тергеу амалдары жүргізілуде. Ер адамдардың осыған ұқсас басқа да қылмыстарға қатыстылығы тексерілуде.
