Венесуэланың ұлттық телекоммуникация комиссиясы X әлеуметтік желісінің жұмысын он күнге тоқтату туралы шешім қабылдады, деп хабарлайды inbusiness.kz сайты.
Осыған дейін президент Николас Мадуро елде TikTok, WhatsApp және Instagram-ға кіруді шектеуді ұсынған болатын. Ел басшысы бұл қосымшаларда шетелдің наразылық қозғалысына қосылуға шақыратын контент таратылып, азаматтар арасында өшпенділік тудырады деген пікірде.
"Twitter деп аталған X әлеуметтік желісі Илон Маскқа тиесілі. Әлеуметтік желі жеккөрушілікті, фашизмді, азаматтық соғысты, өлімді, венесуэлалықтардың қарсыласуын тудыру арқылы ережелерді бұзып отыр, бұл Венесуэланың барлық заңына қайшы. Біз Венесуэладағы заңды орындаймыз", - деді Мадуро.
Президент Николас Мадуро тиісті жарлыққа қол қойды.
Айта кету керек, осыған дейін Еуропалық кеңес Венесуэладағы сайлау нәтижесін мойындаудан бас тартқанын жазған болатынбыз.
