Цифрлық даму, инновациялар және аэроғарыш өнеркәсібі министрі Жаслан Мәдиев әділет саласында жасанды интеллектіні қолдану қалай жүргізіліп жатқанын айтты, деп хабарлайды inbusiness.kz сайты.
"Бұл тәсілдің өзектілігі сот төрелігінің сапасы мен қолжетімділігін арттырудағы халықаралық тәжірибемен расталады. Заң индустриясының көлемі айтарлықтай әлеуетке ие екендігін атап өткім келеді. Кей болжамдарға сәйкес, 2030 жылға қарай аталған индустрия көлемі 3,9 млрд доллар болмақ. Осы үрдіске сүйене отырып, біз осы саладағы жобаларды іске асыруға кірістік. Бүгінде заңнаманы талдауға және заң шығару процестерін автоматтандыруға арналған QazaqLaw жасанды интеллект агенті жұмыс істейді. Агент GhatGpt негізінде жасалды, бірақ кейіннен біз оны қосымша оқытып, жетілдірдік", – деді министр Үкімет отырысында.
Оның сөзінше, министрлік оны цифрлық трансформацияда көмектесу үшін қолданады.
"Агент бізге мемлекеттік органдар үшін ақпараттық жүйелерді құру процесін жеделдету бойынша ұсынымдар қалыптастыруға көмектесті. Осылайша, жасанды интеллект интеграциясы әділет жүйесін одан әрі жетілдірудің қуатты құралы болатынына сенімдіміз", – деді Жаслан Мәдиев.
