Жаңа Конституция жобасы алдағы референдумда қабылданған жағдайда, 2026 жылғы 1 шілдеден бастап күшіне енеді. Бұл туралы Ата заң жобасында жазылған, деп хабарлайды inbusiness.kz сайты.
Тиісті норма жаңа Конституция жобасының "Қорытынды және өтпелі ережелер" атты XI бөлімдегі 94-бапта көзделген.
"Республикалық референдумда қабылданған Қазақстан Республикасының Конституциясы 2026 жылғы 1 шілдеден бастап күшіне енеді, бұған дейін қабылданған Қазақстан Республикасы Конституциясының қолданысы сол мезгілден бастап тоқтатылады. Республикалық референдумда Конституция қабылданған күн мемлекеттік мереке – Қазақстан Республикасының Конституциясы күні деп жарияланады", – делінген құжатта.
Сонымен қатар 95-бапта қолданыстағы Конституцияға сәйкес қалыптастырылған Парламент өз өкілеттігін 2026 жылғы
1 шілдеден бастап тоқтататыны да жазылған.
"Конституция күшіне енген күннен бастап бір ай ішінде Қазақстан Республикасының Президенті Құрылтай сайлауын жариялауға тиіс және ол екі ай ішінде өткізілуге тиіс", – делінген жаңа Ата заң жобасында.
Айта кету керек, бұған дейін Қазақстанда жаңа Конституцияның жобасы жарияланғанын жазғанбыз.
