/img/tv1.svg
RU KZ
Жаңаөзен тұрғынынан 45 келі есірткі тәркіленді

Жаңаөзен тұрғынынан 45 келі есірткі тәркіленді

Оны ізшіл ит тауып алған.  

25 Қыркүйек 2020 16:44 235

Жаңаөзен тұрғынынан 45 келі есірткі тәркіленді

Маңғыстау облысы Жаңаөзен қаласының маңайындағы Теңге ауылының 41 жастағы тұрғынынан 45 келі есірткі табылды. Оның алғашқы он келісін қызметтік ит тапқан, қалған 35 келісі тексеру барысында сарайдан шыққан. Сондай-ақ, ауладағы бақшада қарасораның 180 сабағы өсіп тұрғаны анықталады.

ҚР Ұлттық Ұлан «Батыс» өңірлік қолбасшылығының баспасөз қызметі  хабарлағандай, кептіріліп, қапқа салынған 45 келі есірткіні 23 қыркүйек күні 12-30 сағатта №5548 әскери бөлімінің кинолог маманы Асан Әбдікәрімов пен Детектив атты ізшіл ит жедел-іздестіру шарасы кезінде тапқан.

«Ұлттық Ұланда бес жылдан бері қызмет етіп келе жатқан Детектив - кинологиялық байқаулардың бірнеше дүркін жеңімпазы, талай рет есірткі таратушыларды анықтауға көмектескен», - деп сипаттайды аталған мекеменің баспасөз қызметі. Ит бұған дейін маусым айында 28 жастағы жігіттен жарты келі марихуана тапқан екен.

Құралай Қуатова

Жамбыл облысында қарасора өңдейтін зауыт салу жоспарлануда

Жамбыл облысының аумағында жүз мың гектардан астам жабайы қарасора бар. 

18 Қыркүйек 2020 12:32 294

Жамбыл облысының әкімі Бердібек Сапарбаев жабайы қарасора өсетін үлкен алқаптарға ие Шу және Меркі аудандарының аумағындағы «Қарасора - 2020» жедел-алдын алу шарасының барысымен танысты.

- Президент Қасым-Жомарт Тоқаев есірткі таратқаны үшін жазаны қатаңдатуды тапсырды. Құқық қорғау органдары есірткі құралдарының заңсыз айналымына қарсы тұруда, тыйым салынған препараттардың енуіне және оларды өткізу фактілерінің жолын кесуде. Жыл сайын «Дельта-Долина» есірткі бизнесіне қарсы күрес бойынша аймақаралық бөлім қызметкерлері есірткі тасымалдаушыларды құрықтау маусымын жүргізеді. Нашақорлықтың алдын алуға ерекше көңіл бөлінеді, - деп атап өтті облыс әкімі.

Полиция департаментінің бастығы Жанат Сүлейменовтің айтуынша, жыл басынан бері 423 есірткі қылмысы тіркелген, оның ішінде тыйым салынған заттарды сатудың 82, аса ірі мөлшерде сақтаудың 45, құрамында есірткі бар өсімдіктерді өсірудің 22 фактісі бар. Барлығы 2,4 тоннадан астам есірткі, оның 1,9 тоннасы "Қарасора" жедел алдын алу шарасы аясында тәркіленген. Полицияның күшімен бір келіден астам героин мен осынша мөлшердегі синтетикалық есірткі, 55 келі гашиштің дайындалуы мен тасымалдануына жолы кесілді.

Полиция еріктілермен бірге үйлер мен ғимараттардың қабырғаларынан 550-ден астам граффитиді жазба жойылып, интернеттегі 50-ден астам сайт бұғатталған.

- Жамбыл облысының аумағында жүз мың гектардан астам жабайы қарасора бар. Каннабисті медициналық мақсатта зерттеу және пайдалану қазіргі таңда қарқын алуда. Басқа елдердің тиімді тәжірибесін негізге ала отырып, каннабисті дәрілік мақсаттарда пайдалануға мүмкіндік беретін қауіпсіз және тиімді жүйені құрудың уақыты жетті деп ойлаймын. Бұл жоба өңірдің әлеуметтік-экономикалық дамуына өз үлесін қосатыны сөзсіз, - деді Бердібек Сапарбаев.

Аталған жобаның жүзеге асуына инвесторлар да мүдделі. «Zhana Zhol Holding limited» ЖШС директоры Александр Ким Жамбыл облысы аумағында медициналық каннабис өсіру мен өндіру бойынша жобасын ұсынды. Ол каннабистің өндірістік мақсаттағы айналымы жөніндегі өзге елдердің тәжірибесі туралы айтып берді.

Компания ғылыми-зерттеу жұмыстарын дамытып, қарасораны өсіру мен өндіру бағытындағы заманауи технологияларды енгізіп, кейін дәрі-дәрмек өндірісіне қажетті компоненттерді алуды көздеп отыр. Оның үстіне жергілікті тұрғындар үшін жаңа жұмыс орындары ашылмақ.

- Өңірдің климаттық жағдайы, географиялық орналасуы дәрілік заттардың шикізатын зерттеуге, қайта өңдеуге, өндіруге мүмкіндік береді,- деп атап өтті Александр Ким.

Ол жобаны 4 кезеңде жүзеге асыруды ұсынып отыр. Оның аясында зерттеу жұмыстары жүргізіліп, қолданыстағы заңнамаға өзгерістер енгізілмек. Сондай-ақ, жаңа экономикалық кластер жасақталады.

Бердібек Сапарбаев мүделлі тараптардың бірлесе жұмыс атқаруы маңызды екенін атап өтті.

- Алғашқы кезеңде пилоттық жобаны жүзеге асыру қажет. Осылайша біз тәуекелге жол бермейміз. Жергілікті мемлекеттік органдар министрліктермен тығыз қарым-қатынаста жұмыс атқарып, жобаны созбалаңға салмауы керек, - деп түйіндеді Бердібек Сапарбаев.

Есірткі өсіргендерді тікұшақпен қууға тура келді

1 маусымда басталған республикалық «Қарасора» арнайы операциясы 30 қазанға дейін жалғасады. 

20 Тамыз 2020 14:51 387

Қызылордалық экшн. Мұнда полицияға қарасораны қолдан өсіргендерді құрықтау үшін тікұшақпен қууға тура келді, деп хабарлайды Atameken Business.

Арнайы жасақ түсірген бейнежазба Эскобар жайындағы шытырман фильм кадрларынан кем емес. Екі «Джипке» мініп алып, із суыптпақ болған қылмыскерлер ескерту оғын да елемеген. Сол себепті жол талғамайтын көліктің дөңгелегін атып, тоқтатқан.

Тәртіп сақшылары операция барысында жергілікті үш тұрғынды ұстады. Қуғын кезінде біреуі жарақат алған. Алайда оның өміріне еш қауіп төніп тұрған жоқ. Ұсталғандар есірткі дайындау үшін Қызылорда қаласынан 320 шақырым жерде плантация ұйымдастырған. Өздері де осы маңдағы жер үйді паналап, жабдықтарын сақтапты.

Айта кету керек, 1 маусымда басталған республикалық «Қарасора» арнайы операциясы 30 қазанға дейін жалғасады. Осы уақыт аралығында 430 қылмыс анықталып, 9 тонна есірткі айналымнан алынды.