Бұл туралы ішкі істер министрлігінің ресми өкілі Нұрділдә Ораз мәлімдеді, деп хабарлайды inbusiness.kz.
"Бір аптада интернет қолданушыларға қарсы 230 алаяқтық анықталды. Ақпараттық технологияны қолдану арқылы 6 ұрлық жасалды. Ақпаратқа заңсыз қол жеткізудің 4 фактісі тіркелді. Бұдан бөлек интернет-алаяқтықтың басқа түрлеріне қатысты 30 қылмыс әшкереленді. Полиция қызметкерлері бұрын жасалған 433 қылмысты ашты. Оның 426-сы интернет қолданушыларына қарсы алаяқтық, алтауы IT-технологияны қолдану арқылы жасалған ұрлық болды", – деді Нұрділдә Ораз.
Ресми өкілдің мәлімдеуінше, интернетке жүргізілген мониторинг барысында заңсыз контент жариялайтын 664 ресурс анықталды.
"Жыл басынан бері ішкі істер органдары интернет-алаяқтықтың 13 мыңнан астам фактісін тіркеді. Оның 5 мыңы алаяқтардың онлайн сауда алаңы мен веб-сайттарда орналастырған жарнамаларына негізделген, іс жүзінде жоқ өнімдерге, 2 мың алаяқтық әлдекімдердің біреулердің атына онлайн несие тіркеуге тырысуына қатысты болды. Мобильді банкинг пен банк картасының дерегі арқылы 1 мыңнан астам алаяқтық жасалды", – деді Нұрділдә Ораз.
Қанат Махамбет
