/img/tv1.svg
RU KZ
Hang Seng 23 372,43 KASE 2 155,58
РТС 955,34 FTSE 100 5 510,33
DOW J 21 641,19 Өнеркәсібі 1 552,50
88 техникалық байқау операторы тізілімнен шығарылды

88 техникалық байқау операторы тізілімнен шығарылды

Автокөліктерді техникалық байқаудан өткізу уақытша тоқталуы мүмкін.

12 Шілде 2019 15:38 10441

88 техникалық байқау операторы  тізілімнен шығарылды

Автор:

Қанат Махамбет

Көліктік қадағалаудың аумақтық органдары 2018-2019 жылдар аралығында автокөліктерді міндетті техникалық байқаудан өткізу ісімен айналысатын 152 операторды тексерген. Нәтижесінде заңға қайшы 724 әрекетті әшкерелеп, техникалық байқау операторларына 3 млн 849 мың теңге айыппұл салған.

«Адалдық алаңы» республикалық жобалық кеңсесінің жетекшісі Мирас Қарғабайдың мәлімдеуінше, техникалық байқау операторларының құқықбұзушылығына қатысты 193 әкімшілік хаттама толтырылып, 88 оператор тізілімнен  шығарылған.

«2018 жылдың қарашасы мен 2019 жылдың наурызы аралығында автокөліктерге берілетін жалған диагностикалық карталарды анықтау мақсатында 150 рейдтік шара ұйымдастырылды. Іс барысында аталған картаны қолдан жасаудың 84 фактісі анықталды. Техникалық байқау операторларына қатысты 26 әкімшілік хаттама толтырылып, 2 қылмыстық іс қозғалды», – деді Мирас Қарғабай.

Басқосу барысында техникалық байқау операторларының құлқынның құлы болып алғаны, олардың автокөлік жүргізушілерінің қауіпсіздігіне бас қатырмайтыны, ақшасын берсе, қолдарына жалған құжат ұстата салатыны айтылды.

Сыбайлас жемқорлыққа қарсы саясат департаментінің директоры Данияр Сабырбаевтың сөзінше, автокөліктерді техникалық байқаудан өткізу тәртібін қайта қарау қажет.

«Бүгінде іске асырылып жатқан техникалық байқаудан бас тартудың қажеттігі логикасына түсінік бергім келеді. Қазіргі кезде техникалық байқау шаралары бастапқыда жүктелген міндетті орындай алмай жатыр. Біздің ойымызша, аталған байқау әділ әрі ашық болуы үшін жалпы тұжырымды әзірлегенше, өкілетті органдар мәселені шешуі керек. Біз техникалық байқауды сапалы жүргізудің тетігі дайындалғанша, оны уақытша тоқтата тұруды ұсынамыз. Осы орайда өкілетті органмен, қоғаммен, «Атамекен» ұлттық кәсіпкерлер палатасымен тақырыпты талқылауды сұраймыз.

Қазіргі күйдегі техникалық байқау бізге қажет пе деген сауалға жауап беруіміз керек. Сарапшылардың пікірінше, қазіргі техникалық байқау автожүргізушілердің қауіпсіздігін қамтамасыз етпейді. Бұл ретте агенттіктің ұстанымына тоқталсақ, техникалық байқау стансасынан өту форматын қайта қарастыру керек», – деді Данияр Сабырбаев.

Қанат Махамбет

inbusiness.kz-ті қараңыз, оқыңыз :

Техникалық байқау орталықтары заңсыз ақша айналдырады

Былтыр техникалық байқау операторларына 3 млн 849 мың теңге айыппұл салынды. 

20 Ақпан 2020 10:53 2437

Техникалық байқау орталықтары заңсыз ақша айналдырады

Осыдан 8 жыл бұрын үкімет автокөліктерді техникалық тексерістен өткізу ісін жеке кәсіпкерлер мен заңды тұлғалардың құзырына берді. Сол-ақ екен елімізде техникалық байқау орталықтары қаптап кетті.

Бүгінгі таңда 645 кәсіпкер 1 500 техникалық байқау орталығында автокөліктерді міндетті техникалық тексерістен өткізеді.

Жасыратыны жоқ, техникалық байқау орталықтарында «бармақ басты, көз қыстыға» жол беріледі. Автокөліктерді техникалық байқаудан өткізушілердің арасында заңды белден басып отырғандар бар. Бұған былтыр 160 техникалық байқау орталығының «Техникалық байқау» бірегей ақпараттық жүйесінен шығарылуы дәлел. Бұл туралы «Ұлттық ақпараттық технологиялар» акционерлік қоғамы басқарма төрағасының орынбасары Дәулет Бекманов:

«Біз техникалық байқау орталықтарының жұмысын қамтамасыз ететін бағдарламаның талаптарын бекіттік. Техникалық байқау орталықтары бекітілген талаппен жұмыс істемеген. Автокөлік байқау орталығына кірген кезде арнайы бағдарлама мемлекеттік тіркеу нөмірін автоматты түрде анықтауы керек. Жүйеге қолмен ақпарат енгізуге болмайды. Осы талапты орындамаған 160 техникалық байқау орталығын «Техникалық байқау» бірегей ақпараттық жүйесінен шығардық», – деді.

Белгілі болғандай, техникалық байқау орталықтары автокөліктерді міндетті техникалық тексерістен өткізбей, техникалық тексеріс бланкісін берген. Салық органдарының назарынан тыс ақша айналдырған техникалық байқау операторларына 193 әкімшілік хаттама толтырылып, 3 млн 849 мың теңге айыппұл салынған.

Сыбайлас жемқорлыққа қарсы іс-қимыл агенттігінің мәлімдеуінше, ел аумағында жүргізілетін техникалық байқаудың автокөлік жүргізушілерінің қалтасын қаққаннан басқа пайдасы жоқ.

«Техникалық байқау тиісінше атқарылмайды. Ол жең ұшынан жалғасқан сыбайлас жемқорлыққа түрткі болады. Техникалық байқауды жетілдіріп, оған қойылатын талапты күшейту және қайта қарау қажет. Бүгінгі техникалық тексеріс автожүргізушілердің қауіпсіздігін қамтамасыз етіп отырған жоқ», – деді сыбайлас жемқорлыққа қарсы саясат департаментінің директоры Данияр Сабырбаев.

Айта кетейік, таяуда мәжіліс депутаты Ерсұлтан Бектұрғанов үкімет басшысына депутаттық сауал жолдап, міндетті техникалық байқаудың тиімділігін арттыру қажеттігіне назар аударды.

«Кейбір техникалық байқау орталықтары автокөліктерді тексермей, техникалық байқаудан өткені туралы белгіні қойып береді. Осылайша заңсыз ақша айналымын жасайды. Оларды автокөлік жүргізушілерінің қауіпсіздігі қызықтырмайды. Автокөлік жүргізушілері де мәселені ақшамен шеше салуға дайын тұрады. Бұған тосқауыл қою керек», – деді халық қалаулысы.

Абылай Бейбарыс

ЕАЭО автокөліктерін тіркеу науқаны басталады

Одақ елдерінен келген көліктерге сары нөмір беріледі.  

27 Қаңтар 2020 21:48 2498

ЕАЭО автокөліктерін тіркеу науқаны басталады

ҚР Ішкі істер министрінің бірінші орынбасары Марат Қожаев ЕАЭО елдерінен Қазақстанға әкелінген автокөліктерді уақытша тіркеу және тұрақты есепке қоюдың жолдарын айтты.

«Мемлекет басшысы ЕАЭО елдерінен Қазақстанға әкелінген автокөліктерді 2021 жылдың 1 науырызына дейін кедендік баж бен тіркеу салығын төлеуді кейінге қалдыру арқылы тіркеу керектігі туралы Үкіметке тапсырма берген еді. Бұл бір реттік науқан. Науқанға тек ЕАЭО аумағында жеке қолдану мақсатында алынған авоткөліктер қатыса алады. Мысалы, Қазақстан азаматының атында әкелінген көліктің техникалық паспорты болса, алым-салықтарын төлеп, 2021 жылдың 1 наурызына дейін тіркей алады. Егер Ресей көлігінің сатып алу-сату келісімшарты болса, Ресейге барып, тіркеуден шығарып әкелуге болады», – деді ол.

Марат Қожаев ЕАЭО елдерінен келген көліктері тіркеу кезінде оларға сары түсті нөмір берілетінін айтты. Көліктің аймағы белгіленетін жерде 18 саны жазылған.

«Бұндай автокөліктерді тіркеу үшін  мамандандырылған халыққа қызмет көрсету орталығына келіп мына құжаттарды ұсыну керек: жеке басын куәландыратын құжаты, көліктің нөмірі немесе транзиттік белгісі, көлік құралының куәлігі, автокөлік иесін растайтын құжат және алғашқы тіркеуге, нөмір алуға және техникалық паспорт үшін төлем жасағанын дәлелдейтін түбіртектер. Тіркеу шарттары қарапайым. Кедендік баж, тіркеу алымын төлеу мерзімін созып, бір жыл ішінде төлеуге болады. Бұл көліктерге арнайы мемлекеттік номерлік серия беріледі, ал техникалық паспортында көліктің тіркелуі жайлы арнайы белгі қойылады», – деп үлгі ретінде жасалған сары түсті нөмірлік белгі мен техникалық паспортты көрсетті.

Ішкі істер министрінің бірінші орынбасары Еуразиялық одақ елдерінен келген көліктерді тіркеудің қажеттілігіне ерекше тоқталып өтті.

«Бұл көліктерді ҚР ІІМ деректер базасына енгізу, елімізде тұрақты түрде жүретін көліктер санын білу үшін керек. Ол сандарды атқарушы билік органдары мысалы, елімізге қажетті жанар-жағар май мөлшері мен көліктерден атмосфераға шығатын экологиялық шығарылуды есептегенде білуі керек. Сондай-ақ, жолдар мен автотұрақтар салуды жоспарлау кезінде де жолдарға түсетін шынайы жүктемені анықтау үшін қажет. Автокөліктерді тіркеу, осындай көлік иелерінің жол ережелерін бұзуынан сақтайды. Әрі тіркелген көліктер жыл сайын міндетті техникалық байқаудан өтеді. Бұл көліктің техникалық жағдайының қауіпсіздік талаптарына сай болуын бақылап отыруға мүмкіндік береді», – деді ол.

Марат Қожаевтің айтуынша, рөлі оң жағындағы көліктер тіркелмейді.

«Бізге келіп жатқан көліктердің көбі жол-көлік оқиғасынан кейін, апаттық жағдайдан қайта қалпына келтірілген. Көптеген көліктің оң жағындағы рөлі сол жағына ресми емес түрде ауыстырылған. 2008 жылдан бері рөлі оң жақтағы көліктер техникалық регламентке сай емес. Ондай көліктерді пайдалануға болмайды. Техникалық регламентке сай емес көлікпен жүру, жолаушылар мен айналасындағы жол қозғалысына қатысушылардың өміріне қауіпті», – деді ІІМ өкілі.

Нұржан Көшкін

inbusiness.kz-ті қараңыз, оқыңыз :

Жаңалықтарға жазылу: