Палатаның төменгі палатасының пленарлық отырысына қатысқан 97 депутаттың дауысы сарапқа салынды, деп жазады inbusiness.kz.
Смайыловтың кандидатурасын 82 депутат жақтаса, 7 адам қарсы шықты. Тағы 8-і дауыс беруден қалыс қалды.
Әлихан Смайылов 1972 жылы Алматыда дүниеге келген.
1994 жылы Әл-Фараби атындағы Қазақ мемлекеттік ұлттық университетін "Қолданбалы математика" мамандығы бойынша тәмамдаған.
1996 жылы ҚР Президенті жанындағы Қазақстан менеджмент, экономика және болжамдау институтының мемлекеттік басқару магистрі дәрежесіне ие болды.
1993–1999 жылдары – "А-Инвест" инвестициялық–жекешелендіру қорының бас маманы; бөлім басшысының орынбасары, ҚР Ұлттық статистика агенттігінің басқарма басшысы; ҚР Статистикалық жоспарлау және реформалар жөніндегі агенттігінің Статистика және талдау комитеті төрағасының орынбасары; бас сарапшы, экономика секторының меңгерушісі, ҚР Президенті Әкімшілігінің мемлекеттік инспекторы болып қызмет атқарған.
1999–2003 жж. – ҚР Статистика агенттігінің төрағасы.
2003–2006 жж. – ҚР сыртқы істер вице-министрі, "Экспорттық несиелер мен инвестицияларды сақтандыру жөніндегі мемлекеттік сақтандыру компаниясы" АҚ басқарма төрағасы.
2006–2009 жж. – ҚР қаржы вице-министрі, "ҚазАгро" ҰБХ президенті.
2009–2014 жж. – ҚР Статистика агенттігінің төрағасы.
2014–2015 жж. – ҚР Ұлттық экономика министрлігінің Статистика жөніндегі комитетінің төрағасы.
2015–2018 жж. – ҚР Президентінің көмекшісі.
2018 жылғы қыркүйектен бастап 2019 жылғы ақпанға дейін – Қаржы министрі.
2019 жылғы 25 ақпанда Президент Жарлығымен Премьер-Министрдің Бірінші Орынбасары – Қаржы министрі қызметіне тағайындалды. 2021 жылы 18 қаңтарда ҚР Президентінің Жарлығымен осы қызметіне қайта тағайындалды.
2022 жылғы 11 қаңтарда ҚР Президентінің Жарлығымен ҚР Премьер-Министрі лауазымына тағайындалды.
Айта кетейік, күні кеше ғана ел Үкіметі отставкаға кеткен болатын. Мемлекет басшысы VIII сайланған Парламенттің алғашқы сессиясында сөйлеген сөзінде Премьер-Министр кандидатурасын сайлауда жеңген партия ұсынуға құқылы екендігін мәлімдеді. 30 наурыз күні Қасым-Жомарт Тоқаевқа "AMANAT" партиясы ұсынған Үкімет басшысы лауазымына Әлихан Смайылов кандидатурасы ұсынылды.
