Бұл жолы кәсіпқой боксқа біржола бет бұрған Баходир даңқты боксшылармен кездескісі келетінін айтты, деп хабарлайды inbusiness.kz сайты The Ring басылымына сілтеме жасап.
14 жекпе-жегін де мерзімінен бұрын аяқтаған өзбекстандық спортшы аса ауыр салмақта әлем чемпионы, украиналық Александр Ускипен (23-0, 14 КО) жұдырықтасуды қалайды.
Еске салайық, ол 6 ақпанда Канаданың Монреаль қаласында франциялық боксшы Давид Спильмонмен (16-1, 11 КО) шаршы алаңға шығуы керек еді.
– Менің бар мақсатым – әлем чемпиондарымен жұдырықтасу. Егер маған 2-3 ай уақыт берсе мен Усикпен жекпе-жек өткізуге дайын болар едім. Мен өз күшімді Усик, Джошуа секілді боксшылармен салыстырып көргім келеді. Олар да мен секілді Олимпиада чемпиондары ғой, кәсіпқой бокста үлкен жетістіктерге жетті, – деді Б.Жалолов.
Шыны керек, оған соңғы 10 жыл көлемінде әуесқой бокста ешкім лайықты қарсылас бола алмады. Сондықтан, Олимпиада ойындарының 2 дүркін чемпионы атанды. Кәсіпқой бокста да бірыңғай жеңіске жетуде. Бірақ, бокс сарапшылары оның қарсыласының бәрі "қапшық" болғанын жазған еді. Боксшының мұндай шешім қабылдауына өзіне қарата айтылған пікірлер әсер етсе керек-ті.
