"Белорусь пен Қазақстанның қазіргі қарым-қатынасы екі елдің стратегиялық мақсаты мен мүддесіне сай. Бұл көпжылғы қажырлы еңбектің нәтижесі. Ол бізге болашаққа жоспар құруға негіз болып отыр", – деді Александр Лукашенко.
Оның сөзінше, Минск пен Нұр-Сұлтан арасында байсалды байланыс орнатылған. Ал сенім дәрежесі кез келген мәселені ашық талқылауға мүмкіндік беріп отыр.
"Екі елдің әлеуметтік-экономикалық саясаты мен экономиканың нақты секторын қолдауға деген ұмтылысы ұқсас. Сондықтан біз бүгін шағын құрамда өткізген кездесуде экономика саласындағы байланысқа басымдық бердік. Себебі бізде саясатта, әскери-техникалық байланыста немесе дипломатиялық қарым-қатынаста мәселе жоқ", – деді Беларусь Президенті.
Александр Лукашенконың мәлімдеуінше, Беларусь – Қазақстанның негізгі сауда серіктесі.
"Үш жылда тауар айналымының көрсеткіші екі еседен артық өсті. 2018 жылы тауар айналымының құны 900 млн долларды құрады. Біз миллиард деген межені бағындыруға жақынбыз", – деді Александр Лукашенко.
Ол соңғы жылдары Беларусьте Қазақстан импортының көлемі артқанын айтты.
"Былтыр және биыл Қазақстанның импорты 45%-ға жетті. Егер алдағы уақытта осылай жалғасатын болса, екі елдің импорт алмасу көрсеткіші теңеседі", – деді Беларусь Президенті.
Оның сөзінше, 8 айда Қазақстанның Беларуське тауар жөнелту көрсеткіші 1,5 есеге өскен.
"Қазақстанның екі ел арасындағы тауар айналымының теңгерімін сақтау туралы ұсынысын құптаймыз", – деді Александр Лукашенко.
Сөз арасында ол Беларусь Қазақстанмен бірлескен кәсіпорын ашуға мүдделі екенін жеткізді.
"Сауда-экономикалық немесе мәдени-әлеуметтік қарым-қатынаспен шектелмеуіміз керек. Бізге өндірісті дамыту үшін бірлескен кәсіпорын ашқан тиімді", – деді Александр Лукашенко.
Бұдан кейін Беларусь Президенті Қасым-Жомарт Тоқаевқа қонақжайлық көрсеткені үшін ризашылығын білдіріп, екі ел арасында қалыптасқан тарихи достықтың тамыры тереңдей беретініне сенім білдірді.
Қанат Махамбет
