/img/1920х100.png
/img/tv1.svg
RU KZ
DOW J 24 580,91 Hang Seng 24 266,06
FTSE 100 6 045,69 РТС 1 215,69
KASE 2 384,89 Brent 36,55
Павлодарлықтар МӘМС жүйесіне 10,2 млрд теңге аударды

Павлодарлықтар МӘМС жүйесіне 10,2 млрд теңге аударды

Жаңа жүйеге жергілікті халықтың 61,4 пайызы оң көзқарас танытқан.   

16:12 26 Қараша 2019 2913

Павлодарлықтар МӘМС жүйесіне 10,2 млрд теңге аударды

Автор:

Фархат Әміренов

Келер жылы елімізде міндетті әлеуметтік медициналық сақтандыру жүйесі енгізіледі. Бүгінде осы бағытта қызу жұмыстар жүргізілуде. Павлодар облысында да ауқымды жұмыстар қолға алынды. Әсіресе, емхана тіркеуіне алынбаған адамдарды анықтау, халықты ақпараттандыру жұмыстарына басымдық берілуде.

Осы жылдың қыркүйек айындағы жағдай бойынша Павлодар облысы адамдардың емханаға тіркелу деңгейі бойынша 15-орынды алған еді. Өйткені 49 043 адам тұрғылықты мекенжайы бойынша тіркеуге тұрмаған екен. Жауапты мамандар бұл бағыттағы жұмысты күшейтіп, 38 447 адамның мәртебесі анықталған. Оның ішінде 35 928 адам мемлекетімізден қоныс аударған, 1 579-ы қайтыс болған, 15-і із-түссіз жоғалған, 823-і тіркеуге алынған. Нәтижесінде облысымыз тұрғындардың емханаға тіркелу деңгейі бойынша 4-орынға көтерілді. Қазіргі уақытта қалған 10 590 адамды анықтау бағытында жұмыстар жалғасуда. Кез келген адам міндетті әлеуметтік медициналық сақтандыру жүйесінің жемісін көруі үшін жұмыс істеуімен қатар емханаға тіркелуі шарт.

«Жергілікті медициналық ұйымдар жаңашылдықты қабылдауға әзір. Бұл ретте техникалық база нығайтылған. Барлық ұйым компьютермен жабдықталып, интернетпен қамтылған. Аймақ дәрігерлері электронды жүйеде еркін жұмыс істейді. Тұрғындардың 100 %-ында электронды төлқұжат бар. Бұл да жұмысты жеңілдетеді», – дейді Павлодар облыстық денсаулық сақтау басқармасы басшысының міндетін атқарушы Ардақ Күзеков.

Әлеуметтік медициналық сақтандыру қорының Павлодар облысы бойынша филиалының директоры Айдар Сейітқазиновтің айтуынша, облыстың жұмыс берушілері мен жеке кәсіпкерлері міндетті әлеуметтік медициналық сақтандыру жүйесіне 10,2 млрд теңге қаржы аударған. Бұл ретте аймағымызда Павлодар қаласы көш бастап тұр. Сонымен қатар, Баянауыл, Шарбақты және Павлодар аудандары үздіктер қатарында.

«2017 жылдың 1 шілдесінен бастап барлық жұмыс берушілер өз қызметкерлері үшін қаражат аударып келеді. Жеке кәсіпкерлер де қарамағында жұмысшыларына төлем жасайды. Жинақталған қаржы Ұлттық банкте сақталады. Барлық ақша міндетті әлеуметтік медициналық сақтандыру шеңберінде медициналық қызметтер пакетін қаржыландыруға бағытталады», – дейді Айдар Сейітқазинов.

Деректерге сүйенсек, бүгінде медициналық сақтандыру қорына 224 млрд теңге жарна түскен. Оның 215 млрд теңгесі жұмыс берушілердің аударымдары болса, 8,8 млрд теңге жеке кәсіпкерлер мен азаматтық-құқықтық келісімшарт негізінде еңбек ететін тұлғаларға тиесілі.

«Сондай-ақ  2019 жылдың қаңтарынан бастап өзін-өзі жұмыспен қамтыған тұрғындар бірыңғай жиынтық төлемін төлей алады. Оған төрт салық түрі – жеке табыс салығы, міндетті зейнетақы жарнасы, әлеуметтік сақтандыру жарнасы және әлеуметтік медициналық сақтандыру қорына төленетін жарна кіреді. Бірыңғай жиынтық төлем жеке тұлғаларға қызмет көрсететін азаматтарға арналған. Бірыңғай жиынтық төлем ай сайын төленеді. Бұл ретте қала тұрғындары 1 айлық есепткі көрсеткіш (2525 теңге) аударса, аудан мен ауыл тұрғындары 0,5 айлық есептік көрсеткіш (1263 теңге) көлеміндегі қаржыны төлеуге тиіс», – деп нақтылады Айдар Сейітқазинов.

Бұл бағыттағы жұмыстар облыстық қоғамдық кеңес мүшелерінің тұрақты бақылауына алынған. Аталмыш кеңестің әлеуметтік-мәдени даму мәселесі жөніндегі комиссия төрайымы Гүлбарам Наурызбаеваның айтуынша, биыл көктем және күз айларында арнайы мониторинг тобы құрылып, өңірдегі қала-аудандардағы дайындық барысымен танысқан. Оның сөзінше, аймақ тұрғындарының 92,9 %-ы жаңашылдық туралы құлақтандырылған. Жаңа жүйеге жергілікті халықтың 61,4 %-ы оң көзқарас танытқан.

Фархат Әміренов

Денсаулық сақтауға жұмсалған шығындардың 42%-ы азаматтардың өз қалтасынан шыққан

Бұл Дүниежүзілік денсаулық сақтау ұйымы белгілеген межеден екі есе көп екен. 

26 Тамыз 2019 10:00 2930

Денсаулық сақтауға жұмсалған шығындардың 42%-ы азаматтардың өз қалтасынан шыққан

Мәселен 2013 жылы кепілдік берілген тегін медициналық көмекке 608,1 млрд теңге бөлінген болса, биыл бұл қаржы 972,7 млрд теңгеге жеткен.

Бұл жайында міндетті әлеуметтік медициналық сақтандыру жүйесін көпшілікке түсіндіру мақсатында Жамбыл облысында арнайы құрылған жұмыс тобының алғашқы отырысында сөз болды. Онда өңірімізге жұмыс сапарымен келген «Әлеуметтік медициналық сақтандыру қоры» коммерциялық емес акционерлік қоғамының басқарма төрағасы Айбатыр Жұмағұлов республика бойынша міндетті әлеуметтік медициналық сақтандыру жүйесін енгізуге дайындық барысын баяндады.

Оның айтуынша, елімізде міндетті әлеуметтік медициналық сақтандыру жүйесін енгізіп, тегін медициналық көмек пакетінің жаңа үлгісін жасауға бірқатар жағдайлар түрткі болды. Негізгілеріне тоқталсақ, бірінші, демографиялық жағдай. Соңғы 10 жылда республика халқының саны 15%-ға көбейіпті. Нәтижесінде қарттар –  27,  балалар саны 24 %-ға артқан. Екіншісі – эпидемиологиялық өзгерістер. Бүгінде 5 түрлі топқа жататын қант диабеті, психикалық ауытқулар, респираторлық (астма, ХОБЛ), онкологиялық аурулар мен инсульт, инфракт сынды жүрек-қан тамыры аурулары 2,5 есеге көбейген. Үшіншісі – ем-дом бағасының 1,5-2,5 есеге дейін қымбаттауы. Төртіншісі – жаңа медициналық технологияның 450-ден астам түрінің қолданысқа енгізілуі.

«Мемлекет денсаулық сақтау саласына яғни, халыққа көрсетілетін тегін медициналық қызметтерге жыл сайын бір триллион теңгеге жуық қаржы бөледі және қаржыландыру көлемі жыл сайын артып келеді. Мысалы, 2013 жылы кепілдік берілген тегін медициналық көмекке 608,1 млрд теңге бөлінсе, 2019 жылы бұл сома 972,7 млрд теңгеге жетті. Өкініштісі, денсаулық сақтауға жұмсалған шығындардың 42 %-ы ел азаматтарының қалтасынан шыққан. Бұл Дүниежүзілік денсаулық сақтау ұйымы белгілеген межеден екі есе көп», – деді басқарма төрағасы.  

Ал Жамбыл облысы бойынша сатып алу жоспарына сәйкес биылғы қаржыландыру көлемі 51,7 млрд теңгені құраса, келесі жылы ол 73,2 млрд теңге болмақ. Демек, қаржыландыру деңгейі 1,4 есеге өседі екен.

Әсел Мұратбекқызы

МӘМС жұмыс берушінің 370 млрд теңгесін үнемдейді

Жыл сайын 2,6 млн қызметкер науқастанып, жұмыс берушілер 370 млрд теңгеге шығындалады.

24 Ақпан 2017 11:46 1415

МӘМС жұмыс берушінің 370 млрд теңгесін үнемдейді

Міндетті әлеуметтік медициналық сақтандыруды (МӘМС) енгізудің негізгі пайдасы – қызметкердің уақытша жұмысқа жарамсыздығына байланысты өндірістегі шығынды азайту.

Осы мәселе кеше үкіметте «Ұлт саулығы – мемлекет бәсекелестігінің кепілі» атты брифингте денсаулық сақтау министрі Елжан Біртанов, Медициналық және фармацевтикалық қызметті бақылау комитеті төрағасының орынбасары Лариса Пак, «Әлеуметтік медициналық сақтандыру қоры» коммерциялық емес акционерлік қоғамының төрайымы Елена Бахмутова, республикалық электронды денсаулық сақтау орталығының бас директоры Олжас Әбішев қатысқан жиында талқыланды.

Денсаулық сақтау министрі Елжан Біртановтың айтуынша, үкімет «Қазақстанның денсаулық сақтау саласына қатысты бірқатар заң актісіне өзгеріс пен толықтыру енгізу туралы» заң жобасын мақұлдады. Оған сәйкес 6 кодекс пен 16 заңға өзгеріс енгізілмек.

Заң жобасында МӘМС және тегін медициналық көмектің кепілдік берілген мөлшеріне, жарна төлеуші мен төлем нысанына байланысты өзгеріс, төлемшінің жаңа санаттарын белгілеу, мемлекеттік төлем жасайтын азаматтар қатарын нақтылау, әлеуметтік медициналық сақтандыру қорының жұмысын ұйымдастыру және МӘМС пен ТМККК бойынша дәрілік қамтамасыз ету мәселелері қарастырылған. Оның ішінде ерекше назарға іліккені жұмыс берушінің неліктен МӘМС жүйесіне қатысатыны туралы ақпарат.

Естеріңізде болса, елбасы жолдауын түсіндіру жұмысы барысында бұл туралы бірқатар ақпарат белгілі болған еді. Оған сәйкес жұмыс беруші 2017 жылдың шілдесінен бастап қызметкерінің айлық жалақысының 2%-ын медициналық сақтандыруға аударып отыруы керек. 2020 жылға дейін бұл көрсеткіш 5 пайызға жетеді.

Қаржылық дағдарыс кезінде шығынға батпаудың жолы қандай? Кәсіпорын басшылары соңғы кезде осы мәселе төңірегінде көп толғанып жүр. Қысқа жіпті күрмеуге келтіру үшін жұмыс күшін дұрыс ұйымдастыра білу маңызды. Алайда бұл кадр штатын орынсыз қысқарта беру дегенді аңғартпаса керек. Қысқартудан бұрын ұжымда қызметті тиімді бөліскен жағдайда ғана кәсіптің тасы өрге домалайды. Яғни бірнеше ортаңқол қызметкердің орнын бір кәсіби маман басуы керек.

Бірақ жұмысты бұлай бөліскенде қызметтік жүктеме де ұлғаятынын ұмытпаған абзал. Мойнына артылған салмақтың салдарынан организмнің қажуы қалыпты жағдай. Сондықтан персонал ұзақ немесе жиі ауыратын болса, өндіріске кері әсері болатынын да ескеру керек.

Сондықтан жұмыс беруші өз қызметкерінің денсаулығын күтуіне жағдай жасау арқылы жұмысының өнімділігін арттырады. Ал ол ауырған жағдайда кететін қаражат медициналық сақтандыру есебінен өтеледі. Бұл қысылтаяң шақта қаржылай қиналмауға көмек екені даусыз.

Сонымен қатар бүгінгі еңбек нарығында екінің бірі білікті маман тарту үшін өз жұмыскеріне толық әлеуметтік пакетті, оның ішінде медициналық сақтандыруды ұсына алмайтыны белгілі. Ал МӘМС енгізген жағдайда әлеуметтік пакет бәріне қолжетімді болады. Бұл – кадр мәселесін шешуге септігін тигізеді. Мысалы экономикасы дамыған елдерде (Франция, Германия, Корея, Жапония) міндетті медициналық сақтандыру үлгісін ұстанады.

МӘМС енгізудің негізгі пайдасы қызметкердің уақытша жұмысқа жарамсыздығына байланысты өндірістегі шығынды азайту. Жыл сайын 2,6 миллионнан астам қызметкер еңбекке жарамсыздық парағын рәсімдейді. Орта есеппен әрбір жұмыскер 12,6 мың теңгенің өнімін шығарады делік. Онда жұмыс берушінің жыл сайынғы шығыны шамамен 370 млрд теңгеге жуықтайды.

Яғни уақтылы профилактикалық тексеруден өтіп тұрған қызметкер аурудың алдын алып, жұмыстан қалмауына мүмкіндік туады. Тіпті көптің қалтасы көтере бермейтін қымбат ем-дом қабылдау қажеттілігі туған жағдайда қор шығынды өз мойнына алып, аурудан жылдам айығуға жағдай жасайды. Сөйтіп қызметкердің еңбекке жарамсыздық күндері азайып, жұмыс берушінің ықтимал шығыны қысқарады.

Серікбол Селеубайұлы