Тамызда "Сбербанк" АҚ-ның корпоративті депозиті өткен аймен салыстырғанда 19,3%-ға қысқарды (107 млрд теңге, 447 млрд теңгеге дейін). Аbctv.kz дәл осындай статистиканы назарға ұсынып отыр. Жеке тұлғалардың депозиттерінің 1,3%-ға (8,8 млрд, 671 млрд теңгеге дейін) өскенін ескергеннің өзінде, банктің жалпы депозиттік базасы тамыз айында 8,8%-ға (98,2 млрд, 1,11 трлн теңгеге дейін) қысқарды.
Назар аударарлығы, Сбербанктің несие қоржыны өсті, ал оның сапасы айтарлықтай жақсарды. Сбербанктің тамыз айындағы кредиттік қоржыны 0,7%-ға (7,8 млрд теңге) өсіп, 1,1 трлн теңгеге дейін жетті. Бұл ретте мерзімі өткен несиелердің үлесі 3%-ға (5 млрд теңге) қысқарып, 162,1 млрд теңгені құрады. Ал сенімсіз кредиттер көлемі (NPL, мерзімі 90 күннен асып кеткен) тамыз айында 16,8%-ға құлдырап (21,4 млрд теңге), 106,2 млрд теңгеге тең болды. Несиелік қоржындағы NPL-дің үлесі қыркүйек айының басында 9,65%-ды құрады.
Дүйсенбі, 9 қазан күні Fitch Ratings халықаралық рейтинг агенттігі "Сбербанк" АҚ-ның эмитент дефолтына жүргізілген ұзақ мерзімді рейтинг бойынша өз болжамын жақсартты. Атап айтқанда, агенттік болжамын "тұрақтыдан" "оң" деңгейге өзгертті. Сондай-ақ алдын ала берілген рейтингтегі "ВВ+" деңгейін растады.
"Болжамдардың өзгеруі "Сбербанк России" ААҚ-ның эмитент дефолтына жүргізілген ұзақ мерзімді рейтингтегі болжамдарды қайта қараумен байланысты болды. Рейтинг өзінің еншілес банкіне қолдау қажет бола қалған жағдайда бас құрылымның мүмкіншіліктері ықтимал артатындығын көрсетіп отырады", – деп үзінді келтірді Fitch Ratings-тен банктің баспасөз қызметі.
Депозиттер ағынына байланысты банктің жиынтық міндеттемелері бір айда 6,6%-ға (100,8 млрд теңге, 1,41 трлн теңгеге дейін) кеміді. Осының салдарынан Сбербанктің автивтері 5,9%-ға (99 млрд теңгеден астам, 1,57 трлн теңгеге дейін) қысқарды. Ал банктің ликвидтік активтері 16%-ға (99,1 млрд, 499 млрд теңгеге дейін) төмендеді. Ай қорытындысы бойынша олардың банк құрылымындағы үлесі 35,7%-дан 31,7%-ға дейін қысқарды.
Жалпы банктік сектордағы корпоративті салымдар көлемі 0,8%-ға (74,5 млрд, 8,93 трлн теңгеге дейін) артқан. Сондай-ақ АТФ банкінде – 8,6% (50,7 млрд, 537 млрд теңгеге дейін) және "ЦентрКредит" банкінде 3,4% (15,8 млрд, 447 млрд теңгеге дейін) салымдар ауған. Осы тұста салымдардың көптеп құйылуы Халық банкіне тиесілі (+10% немесе 160 млрд, 1,7 трлн теңгеге дейін). 2017 жылдан бастап корпоративтік депозиттер бойынша кірістілік көрсеткіштері тұтас секторда төмендегенін көрсетеді.
Сбербанк – активтер көлемі жағынан Қазақстандағы банктер арасында төртінші орынды иеленеді (2017 жылдың 1 қыркүйегіндегі жағдай бойынша 1,57 трлн теңге). Тамыз айының қорытындысы бойынша банктің таза табысы 1,2 млрд теңгені құрады. Ал бөлінбеген пайда көлемі жыл басынан бері 9,2 млрд теңгеге дейін өсті. "Сбербанк"-тің иесі – Ресейдегі ең ірі банктердің бірі саналатын "Сбербанк России" ААҚ.
Еркебұлан Қыздарбек, Камила Абдиева
