2019 жылдан Қазақстанда тегін медициналық көмектің кепілдік берілген көлемі аясында молекулалық-генетикалық тестілеу жүргізіледі. Бұл туралы парламент мәжілісінде медициналық көмек тақырыбына арналған үкімет отырысында ҚР денсаулық сақтау министрі Елжан Біртанов мәлім етті, деп хабарлайды ҚазАқпарат.
Оның сөзіне қарағанда, экономикалық ынтымақтастық және даму ұйымы елдерінде ісіктің ерекшелігіне байланысты жеке емдеу көлемін тағайындауға мүмкіндік беретін обырды молекулалық - генетикалық тестілеу міндетті болып отыр.
"Қазақстанда 2019 жылдан бастап тегін медициналық көмектің кепілдік берілген көлемі аясында молекулалық-генетикалық тестілеу жүргізіле бастайды. Бұл тұрғыда 309 млн теңге қосымша қаржы бөлінген. Өкпе обыры, сүт безі обыры, колоректалдық обыр және тері меланомасына молекулалық-генетикалық диагностика жүргізу үшін 3 референс-зертхана (ҚазОРҒЗИ (Алматы қаласы), Қарағанды, Астана қалаларының онкологиялық орталықтары) айқындалды. Атап айтқанда, 2019 жылы 3 мыңға жуық зерттеу жүргізу жоспарланған", – деп нақтылады ведомство басшысы.
Ерте диагностикалауды жақсарту мақсатында 2019 жылы онкологиялық ауруларға күдікті пациенттерге компьютерлік томография (КТ) және магнитттік-резонанстық томография (МРТ) зерттеулерін жүргізу үшін 1,6 млрд теңге көлемінде қосымша қаржы бөлінген.
"Диагностикалау күрделі науқастарға халықаралық сарапшылардың телеконсультациясы, сондай-ақ маманның "екінші көзқарасы" қолданылатын гистопрепараттардың телепатологиясы енгізілуде. Бұл қадам Экономикалық ынтымақтастық және даму ұйымы елдерінде онкологиялық ауруларды диагностикалауда міндетті компонент болып отыр, енді Қазақстанда 2019 жылдан бастап біз тегін медициналық көмектің кепілдік берілген көлемі аясында іске асыратын боламыз", – деді Елжан Біртанов.
Оның пайымынша, бұл шаралар ерте диагностикалауды (0-1 сатылар) 2022 жылға 33 пайызға дейін арттыруға мүмкіндік береді.
Бұдан бұрын хабарланғандай, үкімет сағаты барысында министр қазақстандықтар қатерлі ісіктің қай түріне жиі шалдығатынын айтты.
