Ақтауда халықаралық Каспий күніне орай дәстүрлі "Таза Каспий – таза жүрек" шарасы болып өтті. Шара аясында жиырма сүңгуір екі топқа бөлініп, қаланы 4 "а" ықшамауданынан бастап "Самал" қонақ үй кешеніне дейін тазалап шықты.
Сүңгуір Шамиль Темірханұлының айтуынша, олар теңіз түбінен үш тонна қоқыс алып шыққан. Адамдар жағада демалып, шомылғаннан кейін бөтелке, қақпақ сияқты ыдыс-аяқтар мен олардың қалдықтарын суға лақтыра берген. Бұдан бөлек, шірімейтін, арзан, сапасыз жіптерден тоқылып, балықтардың, соның ішінде, итбалықтың жүріп-тұруына кедергі келтіріп, тіпті кездейсоқ өліміне себепкер болып жатқан бірнеше ау құраллары мен торлар да анықталып, жинап алыныпты. Каспий теңізінен жиналған қоқыс-қалдық "I love Aktau" белгісінің қасына жиналып, жойылуда.
Өкінішке қарай, биылғы карантин су түбін көптеп-көмектеп тазалауға мүмкіндік бермей тұр. Былтырғы дерек бойынша, 2019 жылы "Таза Каспий – таза жүрек" акциясына екі мыңға жуық адам қатысып, жүзден астам техника жұмылдырылған, соның нәтижесінде, үш жүз тоннаға жуық қоқыс шығарылған екен.
Құралай Қуатова
