Occidental Petroleum компаниясының басшысы Вики Холлубтың пікірінше, мұнайға әлемдік сұраныстың өсу қарқыны жаңа барланған қорлардан шамамен төрт есе жоғары. Бұл туралы inbusiness.kz сайты profinance.ru порталына сілтеме жасап хабарлайды.
"Жаһандық мұнай тапшылығы 2025 жылы басталады. Өйткені, жоғары өнімді кен орындарын барлау қара алтынға сұраныстың өсу қарқынынан артта қалады", — деп есептейді Вики Холлуб.
Оның айтуынша, ХХ ғасырдың көп бөлігінде мұнай компаниялары жаһандық сұраныстың өсуінен шамамен бес есе көп қара алтынды өндірген. Алайда, соңғы онжылдықтарда бұл арақатынас күрт төмендеді және қазір мұнайға әлемдік сұраныстың өсу қарқыны жаңа барланған мұнай қорының көлемінен шамамен төрт есе көп.
"2025 жыл және одан әрі — нарық сұраныс пен ұсыныстың теңгерімсіздігінде болады... Содан кейін, әлемде мұнай тапшылығы пайда болады", — деп атап өтті сарапшы.
Холлубтың болжамынша, жақын арада нарықта мұнайдың артық ұсынысы сақталады. Бірақ содан кейін тапшылықтың ұзақ кезеңі басталады. Сонымен қатар, мұнай саласының топ-менеджерлері ұсыныстың ағымдағы деңгейін ұстап тұру үшін жаңа ресурстар мен жаңа инвестициялар қажет болатынын бұрыннан ескерткен.
Көптеген жылдар бойы ең тұрақты ескертулердің бірі әлемдегі ең ірі шикі мұнай экспорттаушысы Сауд Арабиясынан және оның мемлекеттік мұнай алыбы Aramco-дан келеді. Ел басшылығы мен компанияның өзі энергетикалық ауысу туралы пікірталас орталығында мұнай мен газ өндірісін азайтудың орнына көмірқышқыл газының шығарындыларын азайту жолдары туралы бірнеше рет айтқан болатын.
Қазан айында өткен Energy Intelligence форумында сөйлеген сөзінде Aramco компаниясының бас директоры Амин Насер саудиялық мұнай алыбы жаңартылатын энергия, электр отыны, сутегі және көміртекті ұстау және сақтау технологиялары бойынша жұмыс істеп жатқанын айтты.
Дегенмен, әлемге мұнай мен газ тағы ондаған жылдар бойы қажет болады. Себебі, жаңартылатын энергия көздері адамдардың барлық қажеттіліктерін қанағаттандыра алмайды.
"Алдағы онжылдықта мұнай мен газға сұраныстың өсу перспективалары өндіріске жаңа инвестицияларды қажет етеді", — деді Амин Насер.
