Алматы әкімі Бақытжан Сағынтаев бұған дейін қалада 35 жаңа жедел жәрдем көлігі сатып алынғанын хабарлады. 16 желтоқсанға дейін қосымша 50 жаңа машина келеді. Бұл туралы Өңірлік коммуникациялар қызметі алаңында өткен онлайн-брифинг барысында Алматы қалалық жедел медициналық жәрдем станциясының бас дәрігері Біржан Оспанов мәлім етті.
"Алдыңғы қатарлы әлемдік брендтердің заманауи, портативті құралдарымен жабдықталған 35 жаңа автокөлік алынды. Ағымдағы жылдың соңына дейін тағы 100 жаңа автокөлік келіп түседі деп күтілуде. Жедел медициналық жәрдем қызметі коронавирустық инфекцияның жазғы толқыны кезеңіндегі жұмыс тәжірибесін ескере отырып, материалдық-техникалық базаны жақсартты", — деді Біржан Оспанов.
Сондай-ақ, ол жедел жәрдем көліктерін дезинфекциялық өңдеуге ерекше назар аударылатынын айтты.
Көліктерді дезинфекциялау барлық клиникаларда суық бу генераторы әдісімен жүргізіледі.
"Науқастарды жеткізгеннен кейін стационарларда заманауи технологияларды пайдалана отырып, санитариялық автокөлікті байланыссыз "суық бу" генераторы арқылы дезинфекциялау жүргізіледі. Бұл жұмыстар 10 минутта жүзеге асырылады, ол көліктің медициналық ұйымдарда болуын 3 есеге қысқартады", — деп атап өтті спикер.
COVID-19 жаңа толқынына дайындық аясында диспетчерлік қызмет те күшейтілді. Жедел медициналық жәрдем қызметінің алдыңғы шебінде 365 дәрігер, 1388 фельдшер жұмыс істейді.
Бұдан басқа, жедел медициналық көмек қызметінің жұмысын жаңғырту бойынша келесідей шаралар қабылданды:
— Бригадалар санын 220-ға дейін арттыру;
— Қосымша 40 бригада жасақтау;
— ӘМСҚ қаражаты есебінен резервтік қатардағы 20 көлік әзірлеу;
— Әкімдік қаражаты есебінен жеке компаниялардың 20 автокөлігін тарту;
— Асқыну кезеңінде кадрлар санын 120 фельдшерге дейін ұлғайту;
— Кадрларды тарту;
— АМК және РМК түлектерінен дайындалған 60 ерікті фельдшер алу;
— Жеке медициналық орталықтардың 60 фельдшерін жұмылдыру;
— Асқыну кезеңінде ақпараттық-жедел диспетчерлік бөлімді кеңейту және 103 номері бойынша қабылдайтын фельдшерлер санын 60-қа дейін көбейту;
— Шұғыл түрде жұмыс істейтін 3000-505 Call-орталық ашылды.
Бүгінгі күні жедел медициналық көмек қызметінің құрылымында барлығы 12 қосалқы станция, 180 бригада, 3219 қызметкер бар.
