Мәжілісте "Қазақстан Республикасының кейбір заңнамалық актілеріне инновациялық қызмет саласын мемлекеттік қолдау жүйесін жетілдіру мәселелері бойынша өзгерістер мен толықтырулар енгізу туралы" заң жобасы бірінші оқылымда қаралды, деп хабарлайды inbusiness.kz сайты.
Құжат 2024 жылға арналған заң жобалау жұмыстарының жоспары шеңберінде әзірленді.
"Ол "Инновациялық технологиялар паркі" қорын қайта ұйымдастыру туралы шешімді іске асыруға бағытталған. Жоба Азаматтық, Кәсіпкерлік кодекстерге және сегіз бейіндік заңға өзгерістер енгізуді ұсынады. Барлық бастамалар төрт негізгі бағыт бойынша жүйеленген. Бірінші блок – Astana Hub және "Инновациялық технологиялар паркі" дербес кластерлік қорының функцияларын бір жерде шоғырландыруға бағытталған. Мемлекеттік қолдаудың барлық шараларын Astana Hub инновациялық кластерлік қорына беру ұсынылады, бұл экожүйенің тиімділігін күшейтеді", - деді министр.
Заң жобасының мақсаты – IT-салада жоғары нәтиже көрсеткен Astana Hub үздік тәжірибелерін біріктіру ғана емес, сонымен бірге масштабтау.
"Мықты команда және жаһандық брендтермен серіктестік есебінен біз толыққанды IT-экожүйені құрдық. Нәтижесінде 1 500 резидент жинап, оның ішінде 400 шетелдік қатысумен 28 мың жұмыс орны құрылды. Берілген салық преференцияларының әрбір теңгесіне Astana Hub резиденттері 6,5 теңге түсім, 2,1 теңге экспорт және 1,8 теңге тартылған инвестицияларды қамтамасыз етті", - деді Жаслан Мәдиев.
Оның сөзінше, әрбір қолдау шарасы экономикаға еселенген әсермен қайтарылады. Бұл мемлекеттік қолдаудың жоғары қайтарымын және оның экономикаға қосқан үлесін растайды.
"Сондай-ақ Astana Hub-та құрылған бизнес-процестер тиімді және үздік тәжірибелерге сәйкес жұмыс істейтінін көрсетті. Қазірдің өзінде 500-ге жуық резиденттер жылына $480 млн экспорт өндіреді", - деді ведомство басшысы.
Айта кету керек, осыған дейін "Astana Hub" пен "Инновациялық технологиялар паркі" біріктірілуі мүмкін екенін жазғанбыз.
