Бәсеке құру мақсатында Астана әкімдігі жылыжайлардың, көкөніс қоймаларының, өнім өндіруші кәсіпорындардың, сауда-логистикалық орталықтардың құрылысы бойынша жобаларға жан-жақты қолдау көрсетуде, деп жазады astana.gov.kz.
"Үстіміздегі жылы сыйымдылығы 7 мың тонна болатын бір көкөніс қоймасының құрылысы аяқталды ("Amal A 2009" ЖШС),тағы бір көкөніс қоймасының сақтау қуаттылығы 3,5 мың тоннадан 9,8 мың тоннаға дейін ұлғайтылды ("Arul communication" ЖШС), "Алай базары" сауда-логистикалық орталығы іске қосылды, кешеннің ауданы 27 мың шаршы метрді құрайды, оның 6 мың шаршы метрі азық-түлік тауарларына берілген", деп мәлім етті қаланың ауыл шаруашылық басқармасы.
Сонымен қатар, халықты арзан және сапалы азық-түлік өнімдерімен қамтамасыз ету мақсатында 2016 жылы 110 ауыл шаруашылық жәрмеңкесі өткізіліп, онда 8,9 мың тонна тауар сатылды.
"Делдалдардың қатысуына жол берілмейтін ауыл шаруашылық жәрмеңкелерін өткізу бағалардың маусымдық қымбаттауын ретке келтіреді. Жәрмеңке шаралары өтетін кезеңде жақын маңдағы сауда нысандарында жеміс, көкөніс өнімдерінің бөлшек бағасы 5-10%-ға арзандайды", деп хабарлады басқарма.
