Бүгінде елімізде халықаралық және республикалық мәндегі автожолдарды салу мен жөндеу, оны күтіп ұстау жұмыстарын мемлекеттік бюджет есебінен емес, дербес жүргізу әдісі біртіндеп енгізілуде. Коммерциялық жүйеге құрылған бұл шара өзін-өзі ақтап та жатыр. Бұған дәлел 217 шақырымдық "Астана-Щучинск" ақылы жолынан 2015 жылы 1 миллиард 100 миллион теңге пайда тапқан болса керек. Ал өткен жылы аталған жолмен жүрушілер есебінен 1 миллиард 251 миллион теңге қаржы жиналған. Ақылы жүйе енгізілген 2013 жылдан осы уақытқа дейін аталған жолдың табыс көлемі 3 миллиард 200 миллион теңгені құрапты, деп хабарлайды abctv.kz.
Ендігі кезекте "Батыс Еуропа – Батыс Қытай" халықаралық транзиттік автожолының Жамбыл ауданы трассаларында жүру де ақылы болмақ. "ҚазАвтоЖол" акционерлік қоғамы ұлттық компаниясы Жамбыл облыстық бөлімшесінің басшысы Дәурен Тоқтаров қазіргі уақытта Алматыға баратын жолдағы Тараз-Қайнар автожолында төлем қабылдауды қамтамасыз ететін кешен құрылысы басталғанын мәлімдеді.
Осылайша, кешен жұмысы аяқталысымен жеңіл автокөлік иелері әр шақырымына 1 теңге, ал жүк көліктері мен автобус иелері 15 мың теңге ақы төлейтін болады. Мысал ретінде айтар болсақ, Тараздан Қордайға жету үшін жеңіл көлік 350, ал жүк көлігі мен автобус жүргізушісі 5 250 теңге төлемек.
Ресейдің Санкт-Петербург қаласы мен Қытайдың Чженчжоу қалалары арасындағы 8445 шақырымдық жолдың Қазақстанның 5 облысы арқылы өтетін 2787 шақырым жолымен бүгінде жүйткіп жүріп жатқан көліктер қарасы өте көп. Яғни, жол жүру толықтай ақылы жүйеге көшкенде автобан құрылысына кеткен шығын жуық арада-ақ өзін-өзі ақтап алары сөзсіз.
