Бес президенттік бастаманы іске асыруға мемлекет 102,5 млрд теңге жұмсайтын болады, деп хабарлайды abctv порталы.
Бұл туралы бүгін қаржы вице-министрі Берік Шолпанқұлов мәлім етті.
Басшысыз қалған қаржы министрлігі ұжымы өз бетінше "2019-2021 жылдарға арналған республикалық бюджет" жобасын парламентке енгізді.
Құжат 2019-2023 жылдарға дейінгі әлеуметтік-экономикалық даму болжамы негізінде әзірленген және бюджеттің мұнайдан тәуелділігін төмендету бойынша үдемелі саясатты іске асыруды қамтиды.
Ұсынылған бюджет жобасына сәйкес, алдағы үш жылда ел қазынасының сипаты келесідей болады:
Республикалық бюджет түсімдері 2019 жылы – 9 751,3 млрд теңгені, 2020 жылы – 10 083,1 млрд теңгені, 2021 жылы – 10 491,2 млрд теңгені құрайды.
Шығыс бөлігінде одан 2019 жылы – 10 696,7 млрд теңге, 2020 жылы – 11 080,8 млрд теңге, 2021 жылы – 11 427,9 млрд теңге қаржы жұмсалады.
Осы аралықта ел бюджеті профицитті емес, қалпымен дефицитті болады. Нақтырақ тоқталсақ, тапшылық 2019 жылы – 945,4 млрд теңге немесе ЖІӨ-ге шаққанда 1,5% көлемінде болса, 2020 жылы ол 997,7 млрд теңгеге дейін өседі, бірақ ЖІӨ-ге қатысты 1,4%-ды ғана құрайды. Ал 2021 жылы бюджет тапшылығы 936,7 млрд теңгеге немесе ЖІӨ-ге қатысты 1,3%-ға дейі төмендейді.
Республикалық бюджет шығыстарын келесідей бөлу ұсынылады. Әлеуметтік сала шығыстары 2019 жылы 463 млрд теңгеге ұлғая отырып, 4 триллион 717,3 млрд теңге көлемінде жоспарланды. 2020 жылы бюджеттің әлеуметтік шығыстары 5 триллион 176,5 млрд теңге, 2021 жылы – 5 517,8 млрд теңге межесіне дейін жетеді.
Экономиканың нақты секторын дамытуды қолдауға 2019 жылы 1 триллион 608,8 млрд теңге қарастырылды. Бұл биылғыдан 70,2 млрд теңгеге көп. 2020 жылы осы бағытқа 1 трлн 262,6 млрд теңге, 2021 жылы – 1 трлн 121,1 млрд теңге арна тартады.
