Қыс басталғаннан бері Астана көшелерінен 890 мың текше метр қар шығарылды, бұл 67 мыңнан астам рейсті құрайды. Бұл туралы inbusiness.kz сайты елорда әкімдігінің баспасөз қызметіне сілтеме жасап хабарлайды.
Ресми мәліметтерге сәйкес, қаңтардың 1-нен 2-не қараған түні Астана қаласы көшелерінен 30654 текше метр қар немесе 2204 рейс қар шығарылды.
Сонымен қатар, қала тұрғындарының қозғалысын қамтамасыз ету мақсатында коммуналдық қызмет тәулік бойы жұмыс істеп жатыр. Соның ішінде, Астана көшелерін қардан тазартуға 1500-ден астам арнайы техника мен 2 500-дей жол жұмысшысы жұмылдырылды.
Айта кетейік, елордада бірнеше жабдықталған қар полигондары бар. Олар жүк көліктерінің нөмірлерін оқу жүйесімен жабдықтаған. Сондай-ақ, ол жерде бейнебақылау камералары орнатылып, жарықтандыру қосылған.
Қала әкімдігі тұрғындар мен қала қонақтарына жолда абай болуға, жол ережесін сақтауға және алыс сапарға шықпауға кеңес береді.
