Еліміздің сыртқы сауда көлемі 7,4% азайды. Жағымсыз жаңалықты сауда және интеграция министрі Бақыт Сұлтанов жариялады.
Министрдің мәлімдеуінше, көрсеткіштің төмендеуіне пандемия әсер еткен.
"Әлем экономикасындағы сауда қарқынының бәсеңдеуі салдарынан I жартыжылдықта Қазақстанның сыртқы сауда көлемі 7,4% төмендеді. Өкінішке қарай, Еуразиялық экономикалық одақ аясындағы құлдырау 10% жетті. Біздің ел үлкен, ал халықтың орналасу тығыздығы төмен. Қалалар бір-бірінен және сыртқы нарықтан шалғай орналасқан. Сондықтан бізде бәсекеге қабілетті өнім өндіру ғана емес, дайын өнімді нарыққа шығару, шетелге өткізу мәселесі бар. Еуропа мен АҚШ-қа тауар жеткізу өте қиын шаруа", – деді Бақыт Сұлтанов.
Оның айтуынша, бізге көрші елдермен сауда жасаған тиімді.
"Еуроодақ елдері арасындағы тауар айналымы барлық сауданың 63% тең. Өкінішке қарай, Еуразиялық экономикалық одақтағы тауар айналымы
14% ғана құрайды. Пандемия кезінде бұл көрсеткіш тіпті төмендеп кетті", – деді министр
Қанат Махамбет
