Нұр-Сұлтанда Қазақстан халқының бірлігі күнінде қандай мәдени-іс шаралар өтетіні белгілі болды, деп хабарлайды елорда әкімдігінің ресми сайты.
Елімізде COVID-19 пандемиясына байланысты енгізілген карантин режиміне орай көпшілік шаралар тоқтатылды. Көктемгі мерекелер онлайн режимде және отбасы шеңберінде атап өтіледі.
Нұр-Сұлтанда Қазақстан халқының бірлігі күні қарсаңында әлеуметтік желілерде Абайдың "Көзімнің қарасы" әнін ұлттық музыкалық инструментте орындау және әр этностың ұлттық тағамын әзірлеу бойынша акция басталды.
Қазақстан халқының бірлігі күніне орай Қ.Қуанышбаев атындағы Мемлекеттік академиялық қазақ музыка театры "Поэзия" сағатын ұсынады. Онда әртістер көрнекті ақындардың ел бірлігіне арнаған өлеңдерін оқиды – @kazteatr (Фейсбук).
Қуыршақ театры Қазақстан халқының бірлігі күніне орай тікелей эфирде сағат 15:00-де "Біз – бір елміз!" атты онлайн концертін, сағат 21:00-де "Халықаралық қуыршақ театрларының Қуыршақтары мерекемен құттықтайды" атты видео концертін ұсынады. Эфирді "Инстаграмда" – @teatrkukolnursultan, сондай-ақ Teatr Kukol Nur-Sultan YouTube арнасынан көруге болады.
Мемлекеттік академиялық филармонияның симфониялық оркестрі желідегі парақшаларында концерт береді: "Инстаграмда" – astana_filarmoniya, "Фейсбукте" – astana.filarmoniya, сондай-ақ YouTube-та – "Нұр-сұлтан филармониясы" арнасында.
Астана циркінің труппасы, эквилибристтер, әуе гимнасттары, жонглерлер 12:00-де "Инстаграмда" – astanalyqtsirk, "Фейсбукте" – @circusastana және "Астаналық цирк" YouTube арнасында көрсетілім жасайды.
М. Горький атындағы Мемлекеттік академиялық орыс драма театры сағат 17:00-де "Крылатая исповедь воольных сердец" музыкалық-поэтикалық композициясын ұсынады.
"Жастар" театры сағат 21:00-де "Инстаграмда" – @zhastar_teatry, "Фейсбукте" – Zhastar Theatry онлайн-концерт береді.
Nomad театры Insta_teatr жобасы аясында Shakenzo Show атты төрт сағаттық бағдарламасын ұсынады. Эфир 11:00-13:00 және 18:00-20: 00 аралығында "Инстаграмда" – @nomad_teatry парақшасында өтеді.
