"KEGOC" АҚ 2016 жылдың І жартыжылдығы үшін қарапайым акциялар бойынша дивиденттер төлеуге таза кірістің 40%-ын бөлді. Оны ақшаға шаққанда 6,48 млрд теңгені құрайды. Бұл туралы компанияның баспасөз қызметі мәлім етті.
Аталмыш шешім үстіміздегі жылғы қазанның 28-нде "KEGOC" АҚ-ы акционерлерінің кезектен тыс жиналысында қабылданды. 2015 жылдың І жартыжылдығында компания дивиденттер төлеуге 2,444 млрд теңге бөлген. Осылайша, үстіміздегі жылы І жартыжылдықтың дивиденттері 2,7 есе өсті.
"Акционерлердің жалпы жиналысының шешімімен 2016 жылдың бірінші жарты жылдығындағы таза кірістің 6,48 млрд теңге мөлшеріндегі 40% "KEGOC" АҚ-ның жай акцияларын ұстаушыларының барлығына үлестірілетін болады, ол "KEGOC" АҚ-ның бір жай акциясына шаққанда 24, 93 теңгені (жиырма төрт теңге тоқсан үшін тиын) құрайды", – делінген хабарламада. Дивиденттер 2016 жылдың 14 қарашасынан бастап төлене бастайтыны айтылады.
Компанияның 2016 жылғы І жартыжылдықтағы таза кірісі 16,202 млрд теңге болды. Компания 260 млн қарапайым акцияға ие, олардың барлығы саудаға шығарылған. 90% үлеске ие негізгі акционері "Самұрық-Қазына" ҰӘҚ" АҚ болып табылады. 2014 жылдың желтоқсанында "Халықтық ІРО" бағдарламасы аясында KEGOC-тың қарапайым акцияларының 10%-ы Қазақстандық қор биржасына шығарылған болатын. Электр желілерін басқару жөніндегі ұлттық компания еліміздің бірыңғай электр энергиясы жүйесінің операторы қызметін атқарады.
