Коронавирустан көз жұмғандардың 90%-ы егде жастағы науқастар. Бұл туралы ҚР Денсаулық сақтау министрлігінің штаттан тыс инфекционист-дәрігері Бақыт Көшерова айтты, деп хабарлайды inbusiness.kz тілшісі.
Оның пікірінше, коронавирус инфекциясымен күресудің ең тиімді жолы – вакцинация.
"Дәл осы вакцинацияның арқасында адамның иммунитеті түзіліп, ол жұқпалы ауруларға қарсы тұра алады", - деді профессор орталық коммуникациялар қызметінде өткен баспасөз мәслихатында.
Сондай-ақ Бақыт Көшерова Қарағандыдағы медициналық университеті Қазақстанда болған өлім-жітім жағдайларына қатысты зерттеу жүргізгенін жеткізді.
"Зерттеуге сәйкес, СОVID-19 вирусынан қайтыс болғандардың 90%-ы 60 жастан асқан науқастар. Сондай-ақ коронавирустан көз жұмғандардың бірқатарында артериялық гипертензия дерті болған яғни қосымша ауруы болған (66%). Олардың шамамен 50%-ы артық салмақтан, 40%-ы жүректің ишемиялық ауруы мен қант диабетінен зардап шеккен. Жалпы аурудан көз жұмғандарың 60%-ында екі немесе одан да көп қосымша дерті болған, - деді маман.
Ол СОVID-19 вирусымен ауырғандар арасындағы ең әлсіз топ егде жастағы адамдар екенін атап өтті.
"Сондықтан олар міндетті түрде коронавирусқа қарсы вакцина салдыруы қажет", - деп түйіндеді сөзін Бақыт Көшерова.
Айта кетейік, осыған дейін қанша адам екпе салдырудан бас тартқаны хабарланған еді.
Дәурен Ерболат
