Бұл туралы Қазақстанның Сыртқы істер министрі Мұхтар Тілеуберді көрші елдегі жағдайға қатысты ресми комментариінде айтты, деп хабарлайды inbusiness.kz.
"Қазақстанда Қырғызстандағы жағдайдың айқындалып келе жатқан тұрақталу үрдісін ризашылықпен қабылдайды. Көрші мемлекеттегі оқиғаларды тек қана ішкі мәселесі ретінде қарастыра отырып, жаңадан құрылған үкіметті қазіргі күрделі саяси жағдайда өз әрекеттерін тұрақтылық, құқық үстемдігі, қоғамды біріктіру, экономикалық даму үшін жағдай жасауға бағыттауға шақырамыз. Елдің барлық саяси күштерінің Қырғыз Республикасы Конституциясының нормалары мен қағидаттарын қатаң сақтай отырып, дағдарыс жағдайынан абыроймен шығуға мүмкіндік беретін салмақты және іскер шешімдерді іздеуге бар күш-жігерін жұмсайтынына үміт артамыз", – деді министр.
Сондай-ақ М.Тілеуберді кос елді қиын кезеңде өзара көмек пен қолдауға негізделетін бауырлас және тату көршілік тарихи қарым-қатынас байланыстыратынын айтты.
"Біз Қырғызстанның саяси тұрғыдан тұрақты және экономикасы өркендейтін ел болуына, 1997 жылғы 8 сәуірдегі Мәңгілік достық туралы және 2003 жылғы 25 желтоқсандағы Одақтастық қатынастар туралы Шарттардың рухындағы өзара тиімді ынтымақтастықтың ары қарай жалғасуына мүдделіміз", – деп толықтырды ҚР СІМ басшысы.
