Құранды өртеу оқиғасы Швецияның НАТО-ға мүшелікке өтуін қиындата ма?

959

Бұған  АҚШ-тың Мемлекеттік департамент өкілдері алаңдаушылық танытып отыр.  

Құранды өртеу оқиғасы Швецияның НАТО-ға мүшелікке өтуін қиындата ма? Фото: exclusive.kz

Стокгольмде қасиеті Құран кітабы осымен екінші рет өртелді. Бұл оқиға Швецияның НАТО-ға мүшелікке өтуіне кері әсерін тигізуі ықтимал, деп алаңдаулы мамандар.

"Діни мәтінді өртеу - менсінбеу, құрметтемеу және орынсыз әрекет. Бұл туралы біз бірнеше рет айттық. Дегенмен, Вашингтон Венгрия мен Түркияны Швецияның НАТО-ға кіруі туралы хаттаманы ратификациялауға шақыруды жалғастырады. Швеция өткен жылы Мадрид саммитінің аясында Финляндия және Түркиямен келісілген үшжақты меморандум бойынша өз міндеттемелерін орындады деп санаймыз", - деп мәлімдеді АҚШ Мемлекеттік департаменті баспасөз хатшысының орынбасары Ведант Пател.

11 шілдеде Вильнюсте шешуші саммит өтеді. Оның қарсаңында, НАТО-ның бас хатшысы Йенс Столтенберг Франция президентімен ресми кездесті. Эммануэль Макрон Түркия мен Венгрияны Швецияның одаққа кіруін қолдауға шақырады.

Ал, Швецияның Сыртқы істер министрі НАТО-ға кіру үшін Түркия қойған барлық талапты орындадық, дейді. 

"Үшжақты меморандум бойынша, терроризмге қарсы күрес - маңызды талаптың бірі. Террористік ұйымды насихаттайтын, нығайтатын немесе қолдайтын әрекеттерге қарсы жаңа заң күшіне енді. Осылайша, біз келісімнің соңғы тармақтарын орындадық", - деді Швецияның Сыртқы істер министрі Тобиас Билльстрем.

Ал, Түркия әлі ресми мәлімдеме жасаған жоқ.

Еске салайық, Швеция 2022 жылдың 18 мамырында Финляндиямен бір уақытта НАТО-ға мүшелікке өтініш берді. Биыл 4 сәуірде ресми Хельсинки мүшелікке өтті. Ал, Швецияның Солтүстік Атлантикалық Келісім ұйымына қосылуы тікелей Түркия мен Венгрия қолдауына байланысты.

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу