/img/tv1.svg
RU KZ
Оралда Жұбан Молдағалиевке ескерткіш орнатылды

Оралда Жұбан Молдағалиевке ескерткіш орнатылды

Биыл ақынның ғасырлық мерейтойы тойлануда. 

26 Қыркүйек 2020 17:42 393

Оралда Жұбан Молдағалиевке ескерткіш орнатылды

Орал қаласында қала күні қарсаңында биыл туғанына 100 жыл толып отырған ақын Жұбан Молдағалиевтің ескерткіші ашылды. Шараға ақынның жұбайы София Молдағалиева арнайы келіп, облыс әкімі Ғали Есқалиев ҚР президенті Қасым-Жомарт Тоқаевтың құттықтау хатын оқып берді.

Онда «Жұбан Молдағалиев Отанға деген ыстық махаббат пен ерекше сүйіспеншілікке толы туындылары арқылы тұтас халқымыздың рухын асқақтатты. Әсіресе, оның «Мен – қазақпын!» атты поэмасы ұлттық ерекшелігімізді айшықтап, қанымызға сіңген асыл қасиеттерімізді дәріптейді. Сондай-ақ, қазақтың намысын жанып, елдікке шақырады, ерлікке үндейді. Халқымыз Жұбан Молдағалиевтің қоғамды дамыту мен әдебиетімізді өркендетуге сіңірген еңбегін ешқашан ұмытпайды» деп жазылған.

«Мен бұл сапарға ұзақ дайындалдым, осы шараға қатысу үшін көптен ешқайда шыққан да жоқ едім. Сіздерге көп рахмет, алдарыңызда басымды ием!», – деп тебіренді балалары мен немерелерін ертіп келген София Мәлікқызы. 

Айта кетейік, ескерткіштің биіктігі 3,5 метр, табиғи граниттен құйылған тұғырнамасы 1,7 метр құрайды. Оны республикалық байқаудан ұтып шыққан сәулетші-мүсіншілер Серік Рүстамбеков пен Ербол Зиябеков қалаған. Рустамбековтің өзі Жұбан Молдағалиевтің ұлымен бірге оқып, ақынды көзі тірісінде көріп, араласқан екен. Ескерткіштің тасы Алматы қаласынан алынып, Оралдағы «ҚазАрмаПром» зауытында құйылған. Оны жасау үшін облыстық бюджеттен 76 млн теңге бөлінген. 

Құралай Қуатова

Қыздардың мәйітін ауыстырып жібергендер жауапқа тартылды

БҚО әділет департаментінің басшысы Аманжол Әбдірахмановтың айтуынша, қыздың біреуі 13 жасар Айнас Марат облыстық ауруханада қайтыс болған.

22 Қараша 2019 17:50 832

Оралда қыздардың мәйітін ауыстырып жібергендер жауапқа тартылды, деп хабарлайды ҚазАқпарат.

БҚО әділет департаментінің басшысы Аманжол Әбдірахмановтың айтуынша, қыздың біреуі 13 жасар Айнас Марат облыстық ауруханада қайтыс болған.

Оның туысқандары БҚО бойынша сот сараптамалары институтының мәйітханасына қыздың сүйегін алуға келгенде, қателік жіберілген. Сол кезде мәйітханада Оралда көлік қағып кетіп, қаза тапқан 10 жасар Айару Ермектің мүрдесі болған. Санитар шатастырып, соның сүйегін беріп жіберген.

«Осы оқиға бойынша қызметтік тексеру жүргізілді. Соның қорытындысына сәйкес БҚО бойынша сот сараптамалары институтының директоры Олжас Дүйсенбаевқа қатаң сөгіс берілді. Ал сүйекті шатастырып беріп жіберген санитар Мәди Сариев қызметінен босатылды. Екі қыздың тума-туысқандарына көңіл айта отырып, кешірім сұраймын», – деді А.Әбдірахманов.

Еске сала кетейік, бұдан бұрын Оралда мәйітханада 10 жасар қыздың сүйегін шатастырып, басқа біреулерге беріп жібергенін жазған болатынбыз. Ал, Айару Ермек бүгін жер қойнына берілді.

Оралда қызды көлік қаққан тұста жарықтандыру шаралары қолға алынды.

Осы оқиғаға байланысты БҚО әкімі Ғали Есқалиев Орал қаласының әкімі Абат Шыныбековке сөгіс жарияланғанын жеткізді. Сонымен қатар БҚО полиция департаменті, басқа да мекемелерге жол қауіпсіздігі шараларын күшейту тапсырылды. Оған қоса облыс әкімінің орынбасары Аманжол Алпысбаев жетекшілік ететін сарапшы топ құрылды.

Жол апатынан мерт болған қызының денесін мәйітханадан таппай қалды

Оралда жол апатынан қаза тапқан 10 жасар қыздың сүйегін мәйітханада шатастырып, басқа біреулерге беріп жіберген.

22 Қараша 2019 01:13 580

Айару Ермектің әкесі Асылхан Қазиевтің айтуынша, мәйітханаға қызының сүйегін алуға 21 қараша күні сағат 17.00 шамасында барған, деп хабарлайды ҚазАқпарат.

«Мәйітхана қызметкерлері қыздың сүйегін Бөкей ордасы ауданынан келіп, алып кетті деді. Қайта таныстардан Бөкей ордасы ауданы Сайқын ауылдық округіндегі Шоңай елдімекенінен келген тағы бір бүлдіршін қыздың қайтыс болғанын, сүйегін ауылға алып кетеді деп естігенбіз. Дереу телефондарын тауып, соларға хабарластық. Сөйтсек, олар жарты жолға, Жаңақала ауданы Мәстексай ауылы тұсына жетіп қалыпты. Мәйітті ашып қарамаған ғой. Ашса, басқа қыз екенін көрген. Енді олар кері қайтты. Қызымызды жұма күні жерлегелі отыр едік. Өзіміз қайғы жұтып отырғанда, мына жағдай тіпті есеңгіретіп тастады», – деді Асылхан Қазиев.

Қаза тапқан Айару Ермек – Бөкей ордасы ауданынан шыққан елге танымал, өнерлі әулеттен. Атасы Ермек, әкесі Асылхан Қазиевтер – белгілі домбырашылар, анасы Әсел Дәулетова – «Ақжайық» би ансамблінің жетекшісі. Айарудың өзі де бимен, гимнастика, каратэмен айналысқан, талабы зор бүлдіршін еді.