Перизат Қайрат білім алған "Маңғыстау өнер колледжі" мен Эстрада-цирк колледжіне stan.kz тілшісі хабарласып, істің мән-жайын білді, деп жазады inbusiness.kz сайты.
"Маңғыстау өнер колледжі" МКҚК Қасенғалиева Перизат Қайратқызының оқу орнына 2006-2007 оқу жылы "Хорда дирижерлік ету" мамандығы бойынша 1-курсқа қабылданғанын айтқан. Кейін, яғни 2008 жылы Алматы қаласындағы Ж.Елебеков атындағы Эстрада-цирк колледжіне ауысып кеткені жайлы мәлімет бар. Бірінші оқу орны оның не себепті ауысқаны туралы ақпарат бермеген.
Перизат Қайрат екі оқу орнында да 1 жылға жетер-жетпес уақыт білім алған. Ж.Елебеков атындағы Эстрада-цирк колледжі оның оқудан шығып қалғанын растады.
– Колледж мұрағатынан Перизат Қайрат (Қасенғалиева) туралы келесі мәліметтер табылды. Қасенғалиева Перизат – 2008 жылы ақпан айының екінші жарты жылдығынан бастап, Маңғыстау өнер колледжінен ауысуына байланысты 1-курс "Жеке ән салу" бөліміне бюджеттік оқу түріне қабылданған. "Жеке ән салу" бөлімінің 2-курс студенті Қасенғалиева Перизат 2008 жыл қазан айының 24-інен бастап өз еркімен оқудан шығарылған. П.Қасенғалиеваға академиялық анықтама берілген, – деп мәлімдейді колледждің баспасөз қызметі.
Бұған дейін әлеуметтік желіде "Перизат Қайратпен бірге бір колледжде оқыдым" деген қыздың видеосы тараған болатын. Онда П.Қайраттың телефон ұрлағаны және сол арқылы оқудан шыққаны айтылған.
– ...Сол кезде Ақтаудың колледжінен 2-курсқа Қасенғалиева Перизат деген қыз ауысып келді. Бір жарты жылға жетпейтін аз уақытта оның артынан жатақханада телефон, камераларды ұрлап, соның ақшасымен күн көретіні туралы әңгіме тарады. Ол қызды кейін тіпті оқудан шығарып жіберді. Кейде сол қыз қайда кетті екен деп ойлайтын едім, – дейді ол бейнежазбада.
Ж.Елебеков атындағы Эстрада-цирк колледжі әлеуметтік желідегі ақпаратты растамады.
"Колледж мұрағатында П.Қасенғалиеваның ұрлық жасағаны үшін оқудан шығарылғаны туралы мәліметтер жоқ", – делінген жауапта.
Бұған дейін журналист Динара Сәтжан ерікті Перизат Қайраттың ұсталуына қатысты пікір білдірген еді.
