Жетісу облысында өткен 9 айда шағын және орта бизнес субъектілерінің саны 60,1 бірліктен асты. Саланың жалпы өңірлік өнімдегі үлесі 33 % асады, деп хабарлайды inbusiness.kz сайтының тілшісі.
Облыстық кәсіпкерлік және индустриялық-инновациялық даму басқармасының мәліметіне сәйкес биыл шағын және орта бизнесті қаржылай қолдауға 7,4 млрд. теңге бөлінген.
– Осы жылдың 9 айының қорытындысы бойынша шағын, орта бизнесте 369 жоба мақұлданды. Соның ішінде пайыздық мөлшерлемені субсидиялауда 249 жобаға, ішінара кепілдендіруде 118 жобаға қолдау көрсетілсе, 5 млн. теңгелік грант беруде 3 жобаны қамту жоспарланған. Осы жобалардың негізінде өңірде 450-ден астам жұмыс орны құрылады. Оған қоса инженерлік-инфрақұрылым жүргізудің 2 жобасына 50,7 млн теңге қарастырылды, – дейді облыстық кәсіпкерлік және ИИД басқармасының бөлім басшысы Асхат Кәрібаев.
Осындай қолдаудың арқасында облыс орталығында бірқатар шағын кәсіпорындар ашылды. Талдықорғандық кәсіпкерлердің бірі инновациялық жобалар конкурсының негізінде бес миллион теңге мемлекеттік грант ұтып алып, шыны талшықтарын шығаруды жолға қойған.
– Мемлекеттік грант сомасына кәсіпорынға Қытайдан қажетті жабдықтар сатып алдық. Сынған әйнектен шыны талшықтарын шығарамыз. Сондықтан біздің жобамыз "жасыл экономика" саласына қатысты. Бұл өз кезегінде аймақтың экологиялық тепе-теңдігін сақтауға үлес қосады деп есептеймін. Қазір цехта күніне 300 кг шыны талшықтары шығарылады. Оны құрылыс фирмалары құрылыс арматураларын әзірлеуге қажет материал ретінде сатып алуда, – дейді кәсіпорын басшысы Данил Ким.
Сонымен қатар, тағы бір талдықорғандық жеке кәсіпкер мемлекеттік гранттың арқасында жиһаз жасайтын цех ашты. Бес миллиондық грантқа кәсіпкер Д.Құмархан сандық бағдарламамен басқарылатын станоктар әкеліп орнатқан.
– Өзім жиһаз жасаумен бұрыннан айналысамын. Бұған дейін жиһаздың беткі қасбетін Алматыдан тапсырыспен алдыратынбыз, кейде оны ұзақ күтіп, жұмыс тұрып қалатын. Енді мемлекеттен көрсетілген қаржылай қолдаудың арқасында жиһаздың беткі қабатын өзімізге де, өзгелерге де өз цехымызда жасай бастадық. Дәл осындай әмбебап жабдықта әдемі ішкі есіктер жасау да жоспарымда бар. Бірақ ол болашақтың еншісінде, – дейді кәсіпкер.
Салада өндірілген өнім мен көрсетілген қызметтердің көлемі 491,5 млрд теңгені құрады. Бюджетке түсетін салық түсімдері 2023 жылғы деңгеймен салыстырғанда 1,3 есе өсті. Қазіргі кезде олардағы жалпы өңірлік өнімдегі үлесі 33 % асады.
