Жоспарланған жұмыс орындарының басым бөлігі тұрақты емес

Жоспарланған жұмыс орындарының басым бөлігі тұрақты емес

«Жұмыспен қамтудың жол картасы» бағдарламасы аяқталған соң тұрақты жұмыспен тек қана 13 мың адам қамтылатыны анықталып отыр.

10 Сәуір 2020 17:34 163

Жоспарланған жұмыс орындарының басым бөлігі тұрақты емес

Бірқатар облыста өте аз тұрақты жұмыс орындарын ашу жоспарланған.
Бүгінгі Президент Қасым-Жомарт Тоқаевтың төрағалығымен өткен Төтенше жағдай жөніндегі Мемлекеттік комиссияның отырысына облыстар мен республикалық маңызы бар қалалардың әкімдері, мемлекеттік органдар мен құқық қорғау құрылымдарының басшылары бейнебайланыс арқылы қатысты. Отырыс барысында Мемлекет басшысы халықты жұмыспен қамту мәселесіне ерекше тоқталды. 

«Халықты еңбекке тарту үшін «Жұмыспен қамтудың жол картасы» бағдарламасы қабылданды. Вирустан кейінгі кезеңде бағдарлама аясында шамамен 240 мың жұмыс орны ашылады. Бағдарламаны жүзеге асыру үшін бұрын-соңды бөлінбеген қаражат бөлінді. Бұл қаражаттың құмға сіңгендей болып кетпеуі аса маңызды. Сол себепті Үкімет пен әкімдер осыған қазақстандық кадрларды, отандық құрылыс компанияларын және құрылыс материалдарын өндірушілерді тартуға міндетті», – деді Президент.

Мемлекет басшысы жоспарланған жұмыс орындарының басым бөлігі уақытша екенін ескертіп, алдағы уақытта халықты ауқымды әрі сапалы жұмыспен қамту қажеттігін айтты.

«Сонымен қатар, менің қолымдағы талдаулар жоспарланған жұмыс орындарының басым бөлігі уақытша екенін көрсетеді. Бағдарлама аяқталған соң тек қана 13 мың адам тұрақты жұмыспен қамтамасыз етіледі. Бірқатар облыста бағдарлама нәтижесінде өте аз тұрақты жұмыс орындарын ашу жоспарланған. Жұмыспен қамтудың екі түрі арасындағы тепе-теңдік сақталуы қажет. Әрине дағдарыс кезінде уақытша еңбек ету де маңызды, бірақ келешекте халықты ауқымды әрі сапалы жұмыспен қамтуды ойлану керек», – деді Қасым-Жомарт Тоқаев.

Нұржан Көшкін

inbusiness.kz-ті қараңыз, оқыңыз :

Әлемде 25 млн адам жұмыссыз қалуы мүмкін

Қазақстанда дәрігерлерге – 1900 доллар, Өзбекстанда 2700 доллар үстемақы тағайындалды.

31 Наурыз 2020 12:13 139

Әлемде 25 млн адам жұмыссыз қалуы мүмкін

Дүниежүзілік еңбек ұйымының (ДЕҰ) дерегінше COVID-19 пандемиясының кесірінен туындаған экономикалық және еңбек дағдарыс салдарынан әлемде 24,7 млн адам жұмыссыз атануы мүмкін, деп хабарлады Finprom.kz. 

Деректерге сүйенсек, қызметінен босатылатындардың басым бөлігі – жоғары жалақы алатын мамандар. Мәселе ушықпағанның өзінде 2,8 млн адам, ал жағдай үдеген жағдайда 14,6 млн адам айлықсыз қалады. Бұдан бөлек ДЕҰ жалпы халықтың кірісі төмендейтінін айтады. 2020 жылдың соңында әлемде кіріс көлемі 860 млрд-тан 3,4 трлн долларға дейін азаюы ықтимал. Сондай-ақ, кедейлік деңгейі де жоғарылайды деп болжануда. 2020 жылы кедейлер саны 8,8 млн-нан 35 млн адамға дейін артуы мүмкін. 

Бүгінде пандемия Қазақстанның да еңбек нарығына кері әсер етуде. Мәселен, тек Алматы қаласында кәсіпорындарда жұмыс істейтіндер қатары 266 мыңға қысқарды. Сонымен қатар жеке кәсіпкерлердің 80%-ы қызметін тоқтатты. Әйтсе де ел үкіметі ақысыз демалысқа жіберілгендерге 42500 теңге көлемінде әлеуметтік төлем тағайындау, «Еңбекпен қамтудың жол картасы» сынды бағдарламалар арқылы халықты барынша қолдауда. Осылайша дағдарысқа қарсы шараларға 4,4 трлн теңге немесе 10 млрд доллар қарастырылды. 

Әрине, коронавирустық инфекцияның өршіп тұрған кезінде дәрігерлерге үлкен жауапкершілік жүктеледі. Бұл ретте 30 наурыз күні Президенттің тапсырмасы бойынша мемлекеттік комиссия «ақ халаттыларға» қосымша үстемақы тағайындады. 

Төлемдер 3 ай бойына қарастырылған және оны алатын медицина мамандары үш топқа бөлінген: 

Бірінші топ – жалақысына үстемеақы айына 850 мың теңгені құрайды (1900 доллар). Екінші топ – үстемеақысы айына 425 мың теңге (947,5 доллар). Үшінші топ  айына 212 мың теңге (473,7 доллар) үстемеақы алады. 

Ал карантин кезінде жұмыс істеген Өзбекстан дәрігерлеріне 2700 доллар, медбикелерге мен зетханада жұмыс істейтіндерге 1,6 мың доллар, санитарлық қызметкерлерге 1,1 мың доллар, өзге де медицина мамандарына 530 доллар үстемақы тағайындалды. 

Елімізде қандай мамандар тапшы

Қазақстанда жұмыссыздық деңгейі аздап төмендеді.

14 Ақпан 2020 12:48 249

Елімізде қандай мамандар тапшы

Елімізде жұмыссыздар саны бір жыл ішінде 0,1%-ға азайған. finprom.kz мәліметінше, 2019 жылдың төртінші тоқсанында жұмыспен қамтылған халық саны 8,8 млн адамды құрады, бұл 2018 жылмен салыстырғанда 0,7%-ға көбірек. Өткен жылдың төртінші тоқсанында жұмыс істейтін азаматтар саны 8,7 млн болған еді.

Елордада жұмыспен қамтылған қазақстандықтардың саны артқан: жылдық өсім 553,6 мың адамға дейін жетіп, 9,2% құрады. Ал Атырау облысында жұмыспен қамтылғандардың саны 4,1%-ға, Алматы қаласында 2,9%-ға өсті.

Азаматтардың көпшілігі, яғни 1,4 млн адам, немесе 16,3%-ы көтерме және бөлшек сауда, автомобильдер мен мотоциклдер жөндеу саласында жұмыс істейді. Жетекші үш секторға ауыл шаруашылығы, орман және балық шаруашылығы (1,2 млн адам немесе 13,4%) мен білім беру (1,1 млн адам немесе 12,7%) кіреді. Сондай-ақ, ең көп жұмыспен қамтылған 5 салаға өнеркәсіп (1,1 млн адам) және құрылыс (642,2 мың адам) саласы да енген.
Ал елдегі жұмыссыздар саны 2018 жылдың сәйкес кезеңімен (441,9 мың адам) салыстырғанда 0,1% төмендеп, 441,4 мың адамды құрады. Жалпы, Қазақстандағы жұмыссыздық деңгейі 4,8% деңгейінде өзгеріссіз қалды.

Электронды еңбек биржасының мәліметінше, резюме мен бос жұмыс орындарының арақатынасы бойынша еліміздегі ең тапшы мамандықтар – күзетші, қазандық операторы, патруль инспекторы, медбикелер мен мейіргерлер және тәрбиешілер. Ал заңгер, қызметкерлерді жалдау маманы, экономист, малшы, қаржыгер мамандықтары елімізде тым көбейген.

Жұмыссыз азаматтардың көпшілігі халық тығыз орналасқан аймақтарда байқалады. Жұмыссыздардың көпшілігі Алматы (49,2 мың адам, жылына + 0,8%) мен Алматы облысында (48,2 мың адам) және Түркістан (42,1 мың адам) облыстарында.

Пессимистік өңірлер тізіміне Шығыс Қазақстан мен Қарағанды облыстары кірген, онда жұмыссыздар саны тиісінше 34,5 мың және 29,7 мың адам.

Жаңалықтарға жазылу: