Abctv.kz-тің инвестидеялары. KAZ Minerals: қайта құру тиімділігін көрсетті

Елена Брицкая Елена Брицкая
2829

Жақын болашақта KAZ Minerals таза табыс жөніндегі нәтижелерін айтарлықтай арттырады деп санайды брокерлер. Олардың бағалауы бойынша, 2017 жылы табыс 70%-ға, ал 2018 жылы 40%-ға өседі. Акциялардың қазіргі бағасы әзірге мұндай өсімнің боларын аңғартып отырған жоқ. 

Abctv.kz-тің инвестидеялары. KAZ Minerals: қайта құру тиімділігін көрсетті

Нұрлан Рахымбаев, "Асыл-Инвест" АҚ басқарма төрағасының орынбасары

"Акциялар саны (млн): 446,5.

Соңғы баға (теңге): 1937.

Нарықтық капиталдандыру (млн теңге): 887793.

Бір акциядан түсетін табыс (USD, 2016): 0,4. P/E: 15,88.

Теңгерімдік құны (теңге): 361. P/BV: 5,32.

Мақсатты бағасы (теңге): 3000.

Өсу әлеуеті: 55%.

Инвестициялау шегі: жыл.

Түбегейлі қайта құруларды басынан өткерген "KAZ Minerals" компаниясы қарқынды дами бастады. Бизнесті қайта құру пайда әкелді, отандық мыс өндірушінің салалық емес және көп шығынды қажет ететін өндірістерден арылуына мүмкіндік берді. 2016 жылы компания 140 мың тонна мыс шығарып (2018 жылға жоспарланған көлемнің жартысынан кем), 177 млн доллар таза табыс тапты. Аталған нәтижелер мен болашаққа жасалған жоспарларды инвесторлар ескеретіні сөзсіз: 2016 жылы акциялар 3,5 есеге өсті, бірақ бұл басы ғана еді (2017 жылдың I тоқсанындағы қорытынды бойынша өсім қосымша 27%-ды құрады). Алайда аталған жетістік негізінен мыс бағасының динамикасына байланысты болды. Компанияның ішкі драйверлері толығымен жұмыс істеген жоқ.

Акция құнының өсуіне септігін тигізетін мүмкіндіктер мен болашақтағы қозғаушы күш ретінде  келесі тұстарды бөліп көрсетуге болады:

• Өндірістік қуатты қарқынды дамыту. 2016 жылы өндірілген мыс көлемі 140 мың тоннаға жетті, бұл бір жыл бұрынғы нәтижеден 73%-ға артық. II тоқсанда жүргізілген жөндеу жұмыстарына байланысты Бозшакөл кен орны шектеулі қуатпен жұмыс істегеніне қарамастан осы нәтижеге қол жетті. Компанияның 2017 жылға жоспарлаған өндіріс мөлшері 225-260 мың тоннаны құрайды. Ал 2018 жылы KAZ Minerals мыс өндірісін жылына 300 мың тоннаға дейін арттырмақшы, яғни 2010-2011 жылдардың деңгейіне жеткізбек. Аталған мақсат орындалса, орташа жылдық өсім жылдамдығы 50%-дан асады. Бұл ретте компания салалық емес және көп шығынды қажет ететін жұмыстардан бас тартып, негізгі күшті  ірі және бай кен орындарына жұмылдырмақ.

•Ірі жобалардағы негізгі жұмысты аяқтау. Негізгі шығындар айтарлықтай қысқарды, былтыр 1,12 млрд доллар болса, биыл 321 млн долларды құрайды. Ақтоғай жобасы бойынша шығындар бюджеті 200 млн долларға төмендетіліп, құрылыс жұмыстарының ерте аяқталуы, Бозшакөл кен орнының құрылысы кезінде алынған мол тәжірибенің арқасында қол жеткізілген тиімділік, сондай-ақ 2015 жылдың екінші жартысында қазақстандық теңге девальвациясының жағымды әсерінің арқасында 2,1 млрд долларды құрады. Алайда негізгі шығынның бір бөлігі кейінге қалдырылды. Дегенмен ірі жобалардағы негізгі жұмыс аяқталып, кен байыту фабрикалары қуатын арттырып келеді.

•Өндіріс құнының төмендеуіне қарамастан қаржылық нәтижелердің жақсаруы. 2016 жылдың қорытындысы бойынша табыс 15,2%-ға өсіп, 766 млн долларды құрады. Өндірістің өзіндік құны мен операциялық шығындары қысқаруда.

• Топтың жалпы қаржылық өзіндік құны 2016 жылы 156 цент/фунтты құрады, бір жыл бұрын 230 центті құраған болатын. Таза қаржылық құн 59 цент/футқа дейін төмендеді.

• Компания 2011 жылы алғаш рет таза табысқа қол жеткізді, ол 177 млн долларды құрады. Бұл жыл басында Бозшакөл кен орнындағы өндірістің іске қосылуы, сондай-ақ метал бағасының тұрақтауына байланысты болды.

• Кіріс пен табыс бойынша жағымды болжам бар. Егер өндіріс жылына 225-260 мың тоннаға дейін арттырылып келсе және мыс бағасы тоннасына 5500 доллар шамасында сақталса, онда 2017 жылдың қорытындысы бойынша тек қана мыс сатудан түскен пайда 1,24-1,43 млрд долларға жетуі мүмкін. Жалпы 2017 және 2018 жылдарға жасалған сарапшылардың консенсус-болжамы 1,59 млрд және 2 млрд долларды құрайды.

• Теңгерім өтімділігі жақсы деңгейде. Теңгерімінде 1,12 млрд доллар бола тұра компанияда ағымдық өтімділік бойынша қиындық жоқ. Өтімділік коэффициенті (Current Ratio) 2,32 құрайды, ұйғарынды деңгей – 1.

• Ұқсас компаниялармен салыстырғанда нарықтық бағасы төмен. KAZ Minerals-тың коэффициенті P/E2016 = 14,3 деңгейінде бола тұра, дәл осындай шетелдік компаниялармен салыстырғанда дамыған және дамушы нарықтарда әлдеқайда төмен бағалануда. 2017 және 2018 жылдарға жоспарланған кіріске қол жетсе де компания тиісті деңгейде бағаланбауы мүмкін. Алайда компанияның EBITDA маржасы да жоғары және ол алдын-ала болжам бойынша арта береді.

Жағымсыз факторлар:

• Жоғары leverage. Қарыз жүктемесі айтарлықтай жоғары. Debt/Equity Ratio = 7,05, бірақ қарыздың басым бөлігі ұзақмерзімді болып табылады. Таза табыс пайыздық төлемдерден 4,2 есеге артық. Қарыз 2015 жылы Бозшакөл мен Ақтоғайдағы құрылыс жұмыстарына байланысты айтарлықтай ұлғайды.

• Құрылыс материалдары бағасының түзетілу ықтималдығы. 2016 жылдың 20 қазанынан 2017 жылдың І тоқсанына дейін мыс бағасы 27%-ға өсті. Мұндай өсімге президенттік сайлауда Дональд Трамптың жеңісінен кейін АҚШ тарапынан құрылыс шикізаттарына деген сұраныс артады деген үміт себеп болды, өйткені оның сайлауалды бағдарламасында елдің инфрақұрылымына көп көңіл бөлінді. Алайда әлемнің ірі мыс тұтынушы елдері тізімінде АҚШ-тың үлесі бар болғаны 8%-ды құрайтынын есте ұстау керек, оның үстіне америкалық басшының соңғы уақыттағы әрекеті сайлау науқанында айтқандарын іске асыруға асықпайтынын аңғартады. Осылайша қызыл металл бағасының өсуі спекулятивтік әрекеттердің нәтижесі болып отыр (оны KAZ Minerals-тың өзі де жылдың есебінде мойындады). Ал оңай келген ақша дәл солай жылдам кетуі де мүмкін.

•Тағы айта кететін жайт, 2012 жылдан бастап  KAZ Minerals үлеспайда төлемей келеді. 2016 жылдың қорытындысы бойынша директорлар кеңесі таза табысты бөлмеген жөн деп есептейді, себебі қарыз жүктемесін төмендету қажет. Оның үстіне Көксай  кен орнын дамыту үшін де қаражат қажет болады.

KAZ Minerals PLC акцияларының құнын бағалау

Біз компанияның қарапайым акцияларының құнын 3000 теңгеге, немесе 7,5 GBP деңгейінде бағалап отырмыз, өсім әлеуеті 55%-ды құрайды. Компанияның нарықтық капиталын 1340,8 млрд теңге деңгейінде бағалап отырмыз.

Біздің бағалауымыз компания құны/пайдасы (EV/S) және бағасы/табысы (P/E) бағалау мультипликаторлары негізінде нарықтық әдіспен жүргізілді.

EV/S негізіндегі бағалау жуырдағы екі жылда күтілетін өтімділік орташа есеппен 50% деңгейіне жетеді. Яғни қарыздармен қоса есептегенде компанияның құны шамамен үш жылдық пайдаға немесе 4633 млн долларға жетуге тиіс. 2017 жылдың қорытындысы бойынша компанияның түсімі 1598 млн доллар шамасында болады деп күтілуде. 2775 млн доллар мөлшеріндегі таза табысты алып тастасақ, біз 1858 млн доллар акционерлік капитал құнын аламыз. Оны бір акцияға бөлгенде 4,2 долларды құрайды. GBP-ге ауыстырсақ акциялардың құны 3,33 құрайды, ал бұл қазіргі нарықтық бағадан әлдеқайда төмен. Аталған мультипликатор компания акцияларының бағасын айтарлықтай төмендетеді деп есептейміз, себебі қазіргі кездегі оның қарызы тым жоғары. Таза қарыз мөлшері компанияның нарықтық капиталынан асып түседі. Болашақта компания өндіріс көлемін арттырып, қарызын айтарлықтай қысқартуы мүмкін. Одан бөлек, бертін келе KAZ Minerals таза табыс нәтижесін едәуір ұлғайтып келеді. Бағалау бойынша, 2017 жылы табыстың өсімі 70%-ды, ал  2018 жылы 40%-ды құрайды.

Жоғарыда айтылғандардың негізінде KAZ Minerals-тың акциялары едәуір өсуі ықтимал деп есептейміз. Компанияның өндірісті үдетуі болашақта таза табыстың артуына септігін тигізеді. Компанияның шығыны аз, пайдалану мерзімі 40-50 жылдан асатын ірі кен орындары бар, оның инфрақұрылымы заман талабына сай, дамыған, Батыс пен Шығыста өткізу нарықтары мен сенімді серіктестері бар. Жоғарыда аталған қатерлердің ішінде ең ықтималы мыс бағасының төмендеуі болуы мүмкін. Ал жоғары қарыз жүктемесіне келер болсақ, компания өз міндеттерін адал атқарып келеді және кредиторлар арасында беделі жоғары.

Біз KAZ Minerals-тың акцияларын алдағы он екі айда 3000 теңгеге сатып алуды ұсынамыз.

Әйгерім Сүлейменова, Елена Брицкая

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу