Жақында Қазақстан мұсылмандары діни басқармасы желіде уағыз айтып, діни білім беретіндерді тексермек деген ақпарат тарады.
Мүфтияттан мәселенің анық-қанығын анықтап көрдік, деп хабарлайды inbusiness.kz сайты.
"Біз әрқашан дін насихатында жүрген адамның дін қызметкері болуын айтып жүреміз, сондықтан бұл жерде біреудің білімін тексермейміз. Біріншіден, уағыз айтып жатқан адамның мүфтияттың құрамында жұмыс істей ме, бұйрығы бар ма, жоқ па – біз осыған қараймыз. Бұйрығы жоқ адамдарға жұмыстан шығарып жіберу деген секілді жаза қолдана алмаймыз, өйткені ол мүфтияттың құрамында жоқ қой. Біз әрқашан халыққа ҚМДБ-да бұйрығы бар маманнан уағыз тыңдауды, сол маманнан ғана білім алуды насихаттаймыз", – деді ҚМДБ Уағыз насихат бөлімінің меңгерушісі Батыржан Мансұров.
Мүфтият өкілі діни уағызды бірінші кезекте діни басқармада арнайы бұйрығы бар мамандар жүргізетінін атап өтті.
"Біздің жергілікті мешіттерімізде бұйрығы бар имамдар ғана уағыз жүргізеді. Олар ҚМДБ тарапынан берілген тақырыпта уағыз айтады. Әлеуметтік желіде уағыз айтып жатқан мамандардың барлығында біз тек қана бұйрығы бар мамандардан ғана талап етеміз. Әрине, діни білімнің болуы маңызды. Діни білімі болмаған адам ертең елді адастырады, діннен шатастырады", – Батыржан Мансұров.
Дінтанушы Кеңшілік Тышқанұлының айтуынша, құқықтық тұрғыдан алғанда елімізде заңсыз миссионерлікпен айналысу бойынша бап бар.
"Оны қадағалайтын арнайы құзырлы мемлекеттік мекемелер бар. Солар қарап отырады. Қандай да бір заңсыз миссионерлік уағыз айтылған жағдайда, солар анықталып, уағыз айтушы адамның қандай да бір діни бірлестікке тиесілілігі анықталмаса, оған әкімшілік құқық бұзушылық бойынша заңсыз миссионерлікпен айналысу бабы бойынша әкімшілік іс қарастырылады", – деп атап өтті теолог.
Сарапшы әлеуметтік желілер қадағаланып, заңсыз айтылған уағыздар бірден өшіріліп, мұндай парақшалар бұғатталуы керек деген пікірде.
"Бізде уағыз мәселесі реттелуі керек. Содан кейін дін мәселесін айтып жүрген азаматтардың белгілі бір мәртебесі айқындалуы тиіс. Кім қалай болсын солай, білсін-білмесін, ғылыми дәрежесі болсын-болмасын әлеуметтік желіге шығып кеткен. Себебі әлеуметтік желі арқылы аудитория жинау жеңіл", – деді Кеңшілік Тышқанұлы.
Дінтанушы халықтың белгілі бір бөлігі өзінің нақты позициясын айқындамаған, әртүрлі сөздерге еріп кетуші топтарға жататынын айтты.
"Сол үшін бұл жерде ағартушылықтан гөрі, әлеуметтік желідегі уағыздарды реттеген әлдеқайда тиімді", – деді дінтанушы Кеңшілік Тышқанұлы.
Сарапшы сөзінің жаны бар. Себебі әлеуметтік желіні ашып қалсақ, уағыз насихат айтып, осы бағытта ашылған түрлі парақшаларды кездестіруге болады. Қарапайым адам үшін қайсысы дұрыс, қайсысы бұрыс екенін ажырату қиынға соғады. Арасында өзінің бет-әлпетін жасырмай, ашық көрсететін, өзін ұстаз деп таныстырған немесе имам деген жазуы бар парақшалар да бар.
Халықтың діни сауатына көңіл бөлу
Осыдан 2 жыл бұрын Мемлекет басшысы Қасым-Жомарт Тоқаев та қазіргі уақытта өскелең ұрпақтың рухани тәрбиесіне ерекше көңіл бөлу қажет екенін айтқан болатын.
"Жұрттың діни сауатын арттыру керек. Азаматтарымыз шынайы исламның құндылықтарын білуге тиіс. Сол құндылықтарды халық арасында түсіндіріп, дәріптеу қажет. Әсіресе өскелең ұрпақтың рухани тәрбиесіне ерекше көңіл бөлген жөн. Көзі ашық, көкірегі ояу, білімді, санасы сергек ұрпақ ұлтқа адал қызмет етеді", – деді Президент.
