Ұлттық Банктің Ақша-кредит саясаты комитеті базалық 18,0% деңгейінде белгілеу туралы шешім қабылдады, деп хабарлайды inbusiness.kz сайты.
Инфляция 2025 жылдың қорытындысы бойынша 12,3% болып, Ұлттық Банктің болжамына сәйкес келді.
"Инфляцияның қалыптасуына азық-түлік компоненті (13,5%) көп үлес қосты. Оның құрылымында ет пен май бағасының шарықтауы өндіріс шығындарының өсуіне және жоғары экспорттық жеткізілімдерге негізделген. Азық-түлікке жатпайтын инфляция соңғы айларда айырбастау бағамының нығаюына байланысты біршама төмендеді (11,1%), ал реттелетін тұрғын үй-коммуналдық қызметтер тарифінің әкімшілік шараларға байланысты төмендеуі салдарынан ақылы қызметтер бағасының өсу қарқыны баяулады (12,0% дейін)", – деп хабарлады Ұлттық банк.
2025 жылғы желтоқсанда айлық инфляция біршама жеделдеп, 0,9% болды. Базалық инфляция 0,8% деңгейінде – жоғары қалпында қалды.
"Инфляция бұрынғыша ұсыныс мүмкіндігінен асып түсетін орнықты ішкі сұраныс жағдайында қалыптасып отыр. Тарифтік реформаның және ЖЖМ нарығын ырықтандырудың қайталама әсері күтулер мен бағаларға әсер етті. Халықтың алдағы бір жылға инфляциялық күтулері өсіп (14,7%), құбылмалы күйінде қалды. Инфляция бойынша нарықтағы кәсіби қатысушылардың 2026 жылға жасаған күтулері де 10,8%-ға дейін біршама өсті", – делінген хабарламада.
Азық-түліктің әлемдік бағасы соңғы айларда төмендегеніне қарамастан, әлі де жоғары деңгейде қалып отырғаны айтылды. Дәнді дақылдар мен қант бағасы өсу қалпында. Ресей Федерациясында инфляция қатаң ақша-кредит шарттарына байланысты бәсеңдеп, ЕО-да тұрақты түрде төмендеді. АҚШ-та ФРЖ сауда саясатына байланысты инфляциялық тәуекелдердің өскенін атап өтіп, мөлшерлемені біртіндеп төмендетуді жалғастырып келеді. Геосаяси шиеленіс күшейе түсті. Бұл белгісіздікті күшейтіп, мейілінше жоғары инфляциялық жағдайды қалыптастыруы мүмкін, деп хабарлады реттеуші.
"2025 жылы Қазақстан экономикасының өсуі жылдық мәнде 6,5% болды. Бұл ретте көлікте, құрылыста, саудада, сондай-ақ тау-кен өндірісі мен өңдеу өнеркәсібінде жоғары қарқын сақталып отыр. Проинфляциялық тәуекелдер , негiзiнен, ұсыныстың өсу қарқынынан асып түсетін сұраныс, реттелетiн бағалар мен ЖЖМ-ның өсуiнен болатын ұзақ қайталама әсер сияқты iшкi факторларға негiзделген. Жоспардағы ауқымды квазифискалдық ынталандыру форматы мен параметрлері қосымша белгісіздікті қалыптастырады. Ол республикалық бюджетті шоғырландыруда дезинфляциялық әсерді әлсіретуі мүмкін. Тәуекелдер ҚҚС мөлшерлемесін көтеруді және салық төлеушілер қатарын кеңейтуді көздейтін салық реформасын жүзеге асырумен, сондай-ақ таяудағы тоқсандар ішінде бизнесті кейін бейімдеуге де байланысты", – деп хабарлады ҰБ.
Дезинфляцияға бірқалыпты қатаң ақша-кредит шарттары, кепілсіз тұтынушылық кредиттеудің баяулауы (2025 жылғы 11 айда берудің өсуі – 7,3%), ЕТРТ-ні арттыру арқылы артық өтімділікті қысқарту, алтын сатып алуды "айналау" операциялары мен теңге бағамының нығаюы ықпал етеді.
"Ақша-кредит саясаты. Инфляциялық үдерістердің серпіні және тәуекелдер теңгерімі Ұлттық Банктің болжамы мен бағалауына сай қалыптасып отыр. Бұл ретте сыртқы сын-қатерлер, салық жүйесіндегі өзгерістердің ықпалы қаншалықты болатынына қатысты белгісіздік, сондай-ақ осы жылғы екінші тоқсаннан бастап ТКҚ тарифтері мен ЖЖМ бағасының қайта өсу параметрлері базалық мөлшерлемені белгілеуде байыпты әрі сақ ұстанымды қажет етеді. Осыған байланысты базалық мөлшерлеменің 2026 жылғы бірінші жартыжылдық соңына дейін қазіргі деңгейде сақталу ықтималдығы жоғары", – делінген мәліметте.
Базалық мөлшерлеме бойынша кезекті жоспарлы шешім 6 наурызда Астана қаласының уақытымен сағат 12:00-де жарияланады.
Айта кету керек, өткен жылдың қазан айында Ұлттық банк базалық мөлшерлемені 16,5%-дан 18%-ға дейін көтерген болатын. Содан бері базалық мөлшерлеме деңгейі өзгеріссіз қалды.
