Түркияның оңтүстік-шығысындағы Кахраманмараш провинциясында болған жер сілкінісі құрбандарының саны 1498-ге жетті, кем дегенде 8,5 мың адам жарақат алды.
Бұл туралы inbusiness.kz Анадолы агенттігіне сілтеме жасап хабарлайды.
AFAD мәліметінше, Түркияның оңтүстік-шығысында бір күнде жеті балдан асатын екі жер сілкінісі болды (жергілікті уақыт бойынша 04.17-де – 7,7 балл және 13,24-те – 7,6 балл).
Соңғы мәліметтер бойынша, Түркияның он провинциясында 1498 адам қаза тауып, 8553 тұрғын жарақат алған.
Жер сілкінісінің қайталануынан қауіптенген Түркия билігі тұрғындарды үйлеріне қайтпауға шақырды.
Айта кетсек, қазір Түркияда ең жоғары төтенше жағдай жарияланды. Билік халықаралық көмекке жүгінді. Барлық жерде іздестіру-құтқару жұмыстары мен залалды бағалау жұмыстары жүргізіліп жатыр. "Елде дабылдың ең жоғары деңгейі жарияланды. Біз Төтенше жағдайлар басқармасымен бірге өңірге құтқарушылар жібердік", деп мәлімдеді Түркия Ішкі істер министрлігі.
Еске сала кетейік, бүгін Түркияның оңтүстік-шығысында 7,4 балдық жер сілкінісі болды.
Сондай-ақ, Мемлекет басшысы Қасым-Жомарт Тоқаев Түркия Президенті Режеп Тайип Ердоғанға көңіл айту жеделхатын жолдап, Үкіметке Түркияның оңтүстік-шығысында болған жойқын жер сілкінісінің салдарын еңсеруде шұғыл көмек көрсетуді тапсырды.
