Облыс әкімдігіне қарасты "Шығыс Ақпарат" медиахолдингінің 200-ге тарта жұмысшысы "үш айдан бері еңбекақы ала алмай жүргенін" мәлімдеді. Олардың ішінде "Дидар", "Рудный Алтай" газеттері мен Altaynews ақпараттық сайтының журналистері бар.
Altaynews-тің редакторы Дарын Нұрсапардың айтуы бойынша, жұмысшылар "сараң байдың садақасындай-ақ" 150 мың теңге айлық ақшаны көктемнен бері уақытынан кешіктіріп әрі бөліп-бөліп алып келеді. Олар басшылықтың "шыдаңыздаршы" дегеніне шыдап та көрген. Алайда онымен мәселе шешілмеді. Қазір тамыздың еңбекақысы әлі толық қолға тимей отыр.
"Жалақыны "жаль-ақы" дейтін болдық. Айдың аяғында ақшамыздың 40 пайызын ғана ұстатады. Оны нәпақа емес "на пока" дейміз. Өйткені уақытша алдаған түрі екенін білеміз", – дейді қоластындағы тілшілерге еңбекақы төлей алмай отырған ол.
Облыс әкімінің орынбасары танысын жұмысқа алуды "сұрады"
Медиахолдингтің басқарма төрағасы Ерлан Смағұлов мәселені растайды. Ол әуелі болып жатқан жағдайды, одан кейін өзі себеп боларлықтай бір болжамды айтты.
Оның айтуына қарағанда, мәселенің төркіні облыс әкімінің орынбасарында жатуы мүмкін.
"Наурызда облыс әкімінің орынбасары Азамат Мұхамедчинов маған өзінің танысын қоя беріп, орынбасарым етіп тағайындауымды сұрады. Мен бас тарттым. Осының бәрі содан кейін туындап отыр деп ойлаймын", – деді Ерлан Смағұлов.
Осы мәселе бойынша облыс әкімінің орынбасары Азамат Мұхамедчиновке қоңырау шалдық. Ол "телефонмен пікір айтудан" бас тартты.
Оның қоластындағы ішкі саясат басқармасының өкілі Жанат Мекеева: "Келісімшарт бойынша, жасаған жұмыс актілеріне қарай ақша беріліп отыр", - деді.
"Әкімдікке сын"
Мән-жайды тағы да нақтылай түспекке медиахолдингтің бақылаушылар кеңесінің мүшесі, журналист Мерей Қайнарұлымен тілдестік.
"Идеология саласында үлкен жұмыс атқарып отырған білімді де білікті мамандар жалақыға жарымай отыр. Шерағаңша айтсақ, "арқалағаны – алтын, жегені – жантақ". Айтуларынша, тамыздан бері еңбекақыларын ала алмаған. Там-тұмдап беруі беріпті. Бірақ мынау заманда тиын-тебенген жан бағу мүмкін емес. Бүгінгі күнге дейін аталған кәсіпорынның қызметкерлері шыдамдылық танытты. Күні кеше ғана әлеуметтік желіде шу шықты.
Бұған арнайы құрылған қоғамдық бақылау кеңесі назар аударып отыр. Алдағы күндері облыс басшылығы бар, "Шығыс Ақпарат" басшылығы бар, бәріміз бас қосуымыз керек. Сол жерде бұл мәселе жылда қайталанбайтындай етіп шешілсе екен.
P.s. Қызметкерлер жоғарыдағылардың "креслоталас, тақталас, бақталас, интрига, тендер, ақшаның әңгімесінен" жапа шегіп келе жатқанын айтады. Тапсырылған міндетті уақытылы орындаса да, тиісті еңбекақысын ала алмай жүр. Олар жағдай мен басшылықтың тұрақталуын қалайды.
Тасқын Болатұлы
Atameken Business Telegram каналына жазылып, маңызды ақпараттардан бірінші болып құлағдар болыңыз !
