АҚШ Иранға қарсы әскери қысымды қайтадан жүйелі түрде күшейте бастады. Вашингтон Таяу Шығысқа тағы бір ұшақ тасымалдағышпен соққы тобын жіберді. Аймаққа қарай бет алған десанттық топтың құрамында 7 мыңнан астам теңізші және шамамен 2 мың теңіз жаяу әскері бар. Нәтижесінде қазан айының соңына қарай аймақта АҚШ-тың үш ұшақ тасымалдағыш тобы болады. Мұндай күштің шоғырлануы Вашингтонға бірден бірнеше мүмкіндік береді. Иранға қысымды күшейту, қажет болса әуе соққыларын жедел жүргізу мүмкіндігі артады. Сонымен қатар Парсы шығанағы мен Ормуз бұғазындағы теңіз жолдарын бақылап, Иранның зымырандық немесе дрондық шабуылдарына жауап беруге қолайлы болады.
