Бүгін таңертеңгі сағат 8.00-де Ақмола облысының барлық күрежолдары ашылды. Кеше кешкісін қатты боранға байланысты барлық көлік түрі үшін жол жабылған болатын. Дегенмен "Қазавтожол" АҚ облыстық филиалының хабарлауынша, өткен күннің кешінде сағат 10.30-да Астана-Щучье автожолының 97-шақырымы – Ақкөл ауданы маңында жолдың жабылуына байланысты 44 көлік іркілген. Оның – 36-сы жеңіл, 8-і – жүк көлігі. Оларда жалпы саны 81 адам болған. Алтауы – кішкентай бала.
Көліктер қаңтарылған тұста төтенше жағдайлар, жергілікті полиция, жол-патрульдік қызметтерінің мамандары түсінік жұмыстарын жүргізді. Кешкі 23.00-де барлық көлік құралдары аудан орталығы – Ақкөл қаласына бағыт алып, онда жылыту орындарына орналастырылды.
Ақкөл аудандық әкімдігі ыстық аспен қамтамасыз етті. Сондай-ақ дәл осындай жағдай Атбасар ауданында да болды. Кешқұрым, сағат 18:15 шамасында Атбасар-Көкшетау бағытында жол жабылып, соған байланысты 12 көлік: оның 10-ы – жеңіл, 2-еуі – жүк көлігі іркілді. Аталған көліктердегі 17 адам Атбасар қаласында ұйымдастырылған жылыту орындарына орнастырылған.
