Астана қаласының әкімдігі жұмыс берушілер үшін мүгедектерге арналған жұмыс орындарының квотасын анықтауды қаулы етті.
Бұл туралы Қоғамдық кеңестің кезекті отырысында мәлім болды. Отырыс барысында 5 нормативтік құқықтық актінің жобасы қаралды. "Астана қаласындағы жұмыс орындарының квоталарын белгілеу туралы" жобасы жайлы Астана қаласы әкімдігінің "Жұмыспен қамту орталығы" КММ директоры Олжас Омар баяндама жасады, деп хабарлайды Астана қаласы әкімдігінің баспасөз қызметі.
Қаулы жобасымен мүмкіндігі шектеулі жандарды жұмыс орнымен қамтамасыз ету қарастырылған. Егер ұжым құрамында 50 және одан да көп адам есепте болса, онда мүмкіндігі шектеулі жандардың саны 2%-ды құрауы қажет. 101-ден 250 адамға дейін - жұмысшылардың тізімдік санының 3%-ы мөлшерінде, егер кәсіпорын ұжымы 251 адамнан асатын болса, мүгедектерге арналған жұмыс квотасы жұмысшылар санының 4%-ын құрайды.
Сонымен қатар, жобада астаналық жұмыс берушілерге жұмыс орындарын ұсыну қажет болатын тұлғалардың санаты көрсетілді. Олардың арасында бас бостандығынан айыру орындарынан босап пробация қызметінің есебінде тұратын адамдар да бар. Жұмыс квотасы жұмыс орнының жалпы санының 1% мөлшерінде белгіленді. Жастарды жұмыспен қамту мәселесі көрсетілді. Кәсіпорын басшылары білім беру мекемелерін бітірушілері болып табылатын, ата-анасынан айрылған немесе кәмелеттік жасқа жеткенше олардың қамқорлығынсыз қалған жастар арасынан азаматтарды жұмыспен қамту үшін жұмыс орнының жалпы санының бір пайызы мөлшерінде жұмыс орындарының квотасын белгілеу қажет.
