Атырау гарнизонында жауынгерлік атыстар өтуде

1200

Дайындық түнгі мезгілде де жүргізіледі.

Атырау гарнизонында жауынгерлік атыстар өтуде

Атырау гарнизонының әскери қызметшілері "Қарабатан" оқу полигонында атыс жаттығуларын жүргізу арқылы қарқынды әскери дайындықты жалғастыруда. Олар санитарлық-эпидемиологиялық талаптарды қатаң сақтай отырып, енгізіліп жатқан жаңа жаттығулар бойынша дағдыларын жетілдіруде. 

"Атыс дайындығы барлық санаттағы әскери қызметшілермен күндіз де, түнде де жүргізіледі. Ол бойынша әр жаттығу біздің тәжірибемізді арттырып, нәтижелерді жақсартуға мүмкіндік береді. Бұның барлығы өз кезегінде әскери бөлімнің жауынгерлік дайындығына әсер етеді. Бүгінгі атыстар барысында офицерлер, сержанттар мен сарбаздар жақсы нәтиже көрсетіп, қару-жарақты, әскери техниканы қолдану мен нысананы дәл атумен жоғары даярлықтарын тағы бір дәлелдеді", – дейді бөлім командирі подполковник Есболат Нұрекешев.

Атыс даярлығынан басқа, оқу полигонында мамандық бойынша бақылау жаттығуларынан сынақтар қабылдануда. Негізгі мақсат – әскери қызметшілердің лауазымдарына сәйкес білімдерін арттыру. Қысқа мерзім ішінде әскери қызметшілер барлық ұрыс түрлері бойынша іс-қимыл негіздерін, әртүрлі әскери техникалар мен әдістерді игерді, жеке қару-жарақтарының жауынгерлік мүмкіндіктері мен оларды қолдану ережелерін зерттеді.

Сондай-ақ, оқу полигонында даярлық тәжірибесіне енгізу үшін армиялық тактикалық атыс сынақтары өткізілуде. Олардың басты мақсаты - қаруланған әскери қызметшілердің деңгейін арттыру, қазіргі заманғы қарулы қақтығыстардағы дағдыларды жетілдіру болып табылады.

Құралай Қуатова
 

Telegram
БІЗДІҢ ТЕЛЕГРАМ АРНАМЫЗҒА ҚОСЫЛЫҢЫЗ Ең соңғы жаңалықтар осында
Жазылу