БҚО-да қаңғыбас жануарлар мәселесі ақыры шешімін тапқандай. Қазіргі күні бұралқы ит-мысықтарды аулау үшін қалалық ветеринарлық стансамен келісімшарт жасалған. Бұдан бөлек, оларды биозарарсыздандырумен Жәңгір хан атындағы Батыс Қазақстан аграрлық-техникалық университеті айналыспақ. Оқу орны базасында "Жәрдем-Вет" оқу-ғылыми өндірістік орталығының және бұл жұмысқа студенттерді де тарту мүмкіндігінің болуы оған айтарлықтай басымдық берген. Университеттегі питомникте 75 ит-мысық ұстайтын орын бар.
"Жыл соңына дейін облыс бойынша үш мыңнан астам иесіз жануар ауланады. Оның ішінде, Орал қаласының өзінде бұралқы ит-мысық саны жеті жүзге жетіп қалуы керек. Бұл мақсатқа жергілікті бюджеттен 35 454 мың теңге қарастырылған. Жануарлар зарарсыздандырылып, егілген соң босатылады. Ал ішінде адамға қауіпті, құтырғандары болса – көзі жойылады", – деп түсіндірді облыстық ветеринария басқармасы басшысының орынбасары Қазбек Ташимов.
Әрі қарай нақтылай кетсек, бір басты аулау үшін 2600 теңге, зарарсыздандыру үшін жануардың жынысына қарай 11 мың теңге жұмсалады. Сондай-ақ, әрбір ит пен мысыққа чип енгізіліп, олардың ортақ базасы жасақталмақ. Бұдан кейін қайтара қолға түскен жануардың жағдайы чипі арқылы тексеріледі.
Айта кетейік, облыста қаңғыбас ит-мысықтардың көбейіп, үйір-үйірімен жүретін иттердің адамдарды, соның ішінде балаларды қауып алу дерегінің жиілеуі тұрғындардың ренішін тудырған. Қалалық әкімдік үш жылға 188,7 млн теңгеге тендер жариялағанмен, одан жеңімпаз деп табылған "ҚарашығанақПромСервис" ЖШС жеме-жемге келгенде бұл жұмыстан бас тартқан еді. Белгілі болғандай, компанияның жануарларды жинап, уақытша ұстайтын питомнигі елдімекенге тым жақын орналасқандықтан, онда тұратын халық наразы болыпты.
Құралай Қуатова
