Қазақстан бұрынғы Семей ядролық сынақ полигонында кешенді экологиялық зерттеуді аяқтады, деп жазды Inbusiness.kz Ұлттық ядролық орталыққа сілтеме жасап.
"Биыл, полигонның жабылғанына 30 жыл толатын жылы біз полигонның бүкіл аумағына кешенді экологиялық зерттеу жұмыстарын аяқтадық және біз бұрынғы полигонның радиоэкологиялық жағдайы туралы бәрін білеміз деп сеніммен айта аламыз", – деді орталықтың бас директоры Ерлан Батырбеков "Семей ядролық қауіпсіздік аймағы туралы" заң жобасы талқыланған дөңгелек үстелде.
Энергетика министрлігінің материалдарында 2008 жылдан бері жалпы ауданы 18,3 мың шаршы шақырым полигонға кешенді экологиялық зерттеу жүргізілгені атап өтілді. Бірнеше миллион рет өлшеу жүргізіліп, 8,9 мың шаршы шақырым пайдалы жер анықталды. Бұл ретте он мыңдаған топырақ үлгілерін талдау 9,4 мың шаршы метр аумақта топырақтың шектен тыс ластануын көрсеткен.
"Біз радиациялық ластанудың радиоактивті заттардың таралуының маңызды аймақтарын анықтадық. Зерттеу полигондағы радиоактивті ластану жергілікті сипатта және бүкіл сынақ алаңына таралмайтыны туралы түсінік қалыптастыруға мүмкіндік берді", – деді Ерлан Батырбеков.
Ол сондай-ақ полигонның қазіргі уақытта белгіленген шекаралары радиациялық қауіпсіздік тұрғысынан негізсіз және олардың құқықтық мәртебесін қайта қарауды талап ететінін атап өтті.
"Полигонның радиациясы тұрғысынан қауіпсіз жерлерді айналымға қайтару дәстүрлі өндірістердің дамуына, халықтың әл-ауқатының артуына септігін тигізер еді", – деп қосты спикер.
Орталық директоры алдағы уақытта полигонға іргелес аумақтарды кешенді зерттеу жоспарланып отырғанын айтты.
Еске сала кетсек, 1949-1989 жылдар аралығында Қазақстан аумағында әлемдегі ең ірі Семей полигоны жұмыс істеді, онда 40 жыл ішінде 500-ге жуық ядролық қару сынағы жүргізілді. 1991 жылы 29 тамызда Қазақстанның Тұңғыш Президенті Нұрсұлтан Назарбаевтың жарлығымен сынақ алаңы ресми түрде жабылды. 1992 жылы жабық полигон негізінде Ұлттық ядролық орталық құрылды.
Құралай Құдайберген
