Air Astana әлемде аса қауіпті саналатын Boeing 737 MAX 8 ұшақтарын сатып алмақ, деп хабарлайды Atameken Business.
Компания Дубайда өткен авиасалон кезінде аталған маркадағы 30 лайнерге тапсырыс берген. Олардың жалпы құны 3 млрд 600 млн доллар болады. Алайда жаңа әуе кемелері Air Astana-ның емес, оған еншіліс компания Fly Arystan-ның рейстерін орындайтын болады.
Еске салсақ, биылғы жылдың наурызынан бастап Boeing 737 MAX ұшақтарының ұшуына әлем бойынша тыйым салынды. Өйткені осы типтегі екі бірдей лайнер апатқа ұшыраған еді. Бірі Индонезияда, екіншісі Эфиопияда. Салдарынан 346 адам мерт болды. Араға 3 ай салып ұшақты құрастырған компания басшылығы Boeing 737 MAX жолаушылар ұшағының қауіпсіздік сигналы жүйесінің жұмыс істемегенін мойындады. Бұл кемшіліктер бүгінде түзетілуде.
The Wall Street Journal басылымының жазуынша, ұшуға қойылған шектеу алдағы желтоқсан айында алынуы ықтимал.
