Бұл туралы Үкімет отырысында Ауыл шаруашылығы министрі Сапархан Омаров айтты, деп хабарлады inbusiness.kz порталы.
"Алдағы жылдары Ауыл шаруашылығы министрлігі 380 инвестициялық жобаны, оның ішінде импортты алмастыру аясында 250-ге жуық (65%) жобаны іске асыруды жоспарлап отыр. Сондай-ақ, бұл тізімге агроөнеркәсіптік кешеннің экспорттық әлеуетін арттыратын жобалар енгізілген: бордақылау алаңдары, репродукторлар, жылыжайлар және өзгерелі. Жыл сайын кем дегенде 75-80 инвестициялық жоба іске қосылады. Яғни, жобаларының пулы әлі де кеңейетін болады", - деді ведомсво басшысы.
Бұған қоса дәнді және майлы дақылдарды, жемістер мен көкөністерді, қантты, ет пен сүтті өндіру және қайта өңдеу бойынша 7 ірі экожүйені құру жоспарланған.
"Мемлекеттік қолдаудың тиімділігін арттыру үшін биылдан бастап бизнес үшін тиімді міндеттемелер кезең-кезеңімен енгізіледі. Сонымен қатар, базалық қолдау құралдарын субсидиялау көлемін ұлғайту есебінен 2025 жылға қарай ауыл шаруашылығы техникасын жаңарту деңгейін 6%-ға дейін, ғылыми негізделген норманың 30%-на дейін минералды тыңайтқыштарды қолдану, ал жоғары сапалы тұқымдарды енгізу деңгейін 97%-ға дейін жеткізу жоспарлануда", - деді Сапархан Омаров.
Аталған шаралардың нәтижесінде 5 жылда еңбек өнімділігін 2,5 есеге арттыру, өнім экспортын және ауыл шаруашылығы қызметкерлерінің табысын 2 есеге ұлғайту, сондай-ақ салаға 4,1 трлн теңге инвестиция тарту жоспарланып отыр.
"Бұл қосымша 500 мың адамды жұмыспен қамтамасыз етеді", - деп қорытындылады министр.
Құралай Құдайберген
